लोणार शहरातील पाणी प्रश्न सुटणार

लोणार पाणीपुरवठा योजना: जलशुद्धीकरण केंद्राच्या भुमीपूजनप्रसंगी सामाजिक न्याय मंत्री मोघेयांचे वक्तव्य

लोणार : शहरातील नागरिकांनी नगर पालीकेत काँग्रेस पक्षाला संधी दिली. त्यामुळे विकासाकरीता सर्वतोपरी सहकार्य करणार तसेच जलशुद्धीकरण केंद्रामुळे शहराचा पाणी प्रश्न कायमचा सुटणार असल्याचे प्रतिपादन राज्याचे सामाजिक न्याय मंत्री शिवाजीराव मोघे यांनी केले.
लोणार शहराच्या कायमस्वरुपी पाणीपुरवठा योजनेअंतर्गत जलशुद्धीकरण केंद्राच्या भुमिपूजन व आ.अमित झनक यांच्या सत्कार सोहळ्याप्रसंगी ते बोलत होते. कार्यक्रमाच्या अध्यक्षस्थानी जिल्हा काँग्रेस कमिटीचे अध्यक्ष विजय अंभोरे हे होते. तर आ.राहुल बोंद्रे, आ.अमित झनक, श्याम उमाळकर, लक्ष्मणराव घुमरे, बलदेवराव चोपडे, तालुकाध्यक्ष भगवानराव सानप, वसंतराव देशमुख, मेहकर नगराध्यक्ष कासम गवळी, लोणार नगराध्यक्षा रंजना राजेश मापारी, उपाध्यक्ष शे.समद, शहराध्यक्ष शांतीलाल गुगलीया, माजी नगराध्यक्ष खान, साहेबराव पाटोळे, प्रा.गजानन खरात, गोपाल तोष्णीवाल, पंचायत समिती सभापती सुनिल केंद्रे, सदस्य ज्ञानेश्‍वर चिभडे, तालुका सनियंत्रण समितीचे अध्यक्ष राजेश मापारी, मुख्याधिकारी घोलप, अभियंता अजय हाडोळे यांच्यासह सर्व नगरसेवकांची उपस्थिती होती. पुढे बोलतांना ना.मोघे म्हणाले की, शासनाच्या विविध योजना सर्वसामान्यांपर्यंत पोहचविण्यासाठी सर्वतोपरी प्रयत्न करु, शहराला लवकरच शुद्ध पाणी मिळणार असून, नगराध्यक्ष पती राजेश मापारी यांनी पाणीप्रश्न सोडविण्याकरीता पुढाकार घेतला. काँग्रेस पक्षाला नागरिकांनी मोठी साथ दिली, असेही त्यांनी सांगितले. कार्यक्रमाचे प्रास्ताविक राजेश मापारी यांनी केले. यावेळी नगराध्यक्षा सौ.रंजना मापारी व राजेश मापारी यांनी राज्याचे सामाजिक न्यायमंत्री ना.शिवाजीराव मोघे व रिसोड मतदार संघाचे नवनिर्वाचीत आ.अमित झनक यांचा सत्कार केला. कार्यक्रमाचे संचालन प्रा.गजानन खरात यांनी केले.