चिखली : अनेक दिवसांपासून रखडलेल्या चिखली नगर परिषद हद्दवाढ प्रस्तावाला राज्य शासनाने अखेर मान्यता दिली आहे. यानुषंगाने आमदार श्वेता महाले यांनी चालविलेल्या सातत्यपूर्ण पाठपुराव्यास यश आले आहे.
महाराष्ट्र शासनाच्या नगर विकास विभागाने ३० मार्च रोजी चिखली नगरपरिषदेच्या हद्दवाढी बाबत उपसचिव सतीश मुंडे यांच्या सहीने उद्घोषणा केली आहे. शासन निर्णय क्र.एमयूएन २०२०/ प्र.क्र. २०४/ नवि १८ मंत्रालय मुंबई अन्वये चिखली नगरपरिषद हद्दवाढीस मान्यता देण्यात आली आहे. सदर हद्दवाढ ही पूर्वेकडून चिखली भाग क्रमांक २ गट क्रमांक १६६, १६७, १६८, १७० ते १८०, उत्तर १७९ भाग एमायडिसी वगळून १८५, १९१, १९२ भाग एमायडिसी वगळून १९३ भाग एमआयडीसी वगळून १९४ ते २००, २०९ ते २२०, २२३ ते २३०. तर चिखली नगरपरिषदेच्या पश्चिमेकडील सर्वे क्रमांक व गट क्रमांक चिखली भाग २, ३७ ते ४५, ४९, ५०, ५२ ते ५४ तसेच उत्तरेकडील सर्वे क्रमांक व गट क्रमांक चिखली भाग २, १०७, १०८, १५२, १५३, १५६, १५७, १६१, १६२ १६५ आणि चिखली नगरपरिषदेच्या दक्षिणेकडील सर्वे क्रमांक व गट क्रमांक चिखली भाग २, ८ ते १३ व २० ते २२ अशाप्रमाणे प्रस्तावास मान्यता देण्यात आलेली आहे.
शहराची हद्दवाढ होण्यासाठी आमदार श्वेता महाले यांनी २२ नोव्हेंबर २०२० रोजी नगरविकास प्रधान सचिव यांना याबाबत पत्र दिले होते. सन १९८७ मध्ये मंजूर नगर परिषदेचे क्षेत्रफळ ७.८८९ चौ.कि.मी इतके आहे. सन १९८१ च्या जगगणनेनुसार चिखली शहराची लोकसंख्या २७ हजार ६०६ इतकी होती. तेंव्हापासून चिखली शहराची हद्दवाढ झालेली नाही. दरम्यान सन २०११ च्या जणगणनेनुसार चिखली शहराची लोकसंख्या ५७ हजार ८८९ इतकी आहे. तसेच नगर परिषद चिखलीहद्दी बाहेर झपाट्याने विस्तार होत असताना निवासी व वाणिज्य क्षेत्र निर्माण होत आहे. चिखली शहराच्या उत्पन्नाच्या दृष्टीने व वाढीव क्षेत्रातील नागरीकांना मुलभूत सोयीसुविधा उपलब्ध करून देण्यासाठी होत असलेल्या अडचणी सोडविण्याकरीता चिखली नगर परिषदेच्यावतीने जिल्हाधिकारींमार्फत २२ आॅगस्ट २०१९ रोजी हद्दवाढीस मान्यता देण्याबाबतचा प्रस्ताव सादर करण्यात आलेला होता. त्यावर कोणतीही कार्यवाही न झाल्याने आ.महाले यांनी १० मार्च २०२० रोजी नगरविकास मंत्री ना.एकनाथ शिंदे व प्रधान सचिव यांची प्रत्यक्ष भेट घेऊन हद्दवाढीस मान्यता देणेबाबत पत्र दिले होते. दरम्यान या प्रस्तावास मान्यता मिळण्यासाठी आ.महाले यांनी सातत्यपूर्ण पाठपुरावा चालविला होता. दरम्यान प्रस्तावातील त्रृटींचीदेखील पूर्तता करवून घेतली. याशिवाय आ.महाले यांनी विधीमंडळामध्ये तारांकित प्रश्न व कपात सूचनेच्या माध्यमातून सभागृहाचे लक्ष वेधलेले होते. अखेरीस त्यांच्या पाठपुराव्यास यश येवून शहर हद्दवाढीच्या प्रस्तावास मान्यता मिळाली आहे. (तालुका प्रतिनिधी) शहर विकासाला गती मिळणार ! चिखली शहराची हद्दवाढ मंजूर झाल्याने झपाट्याने वाढत असलेल्या वाढीव भागात आता नागरी सुविधा देण्यासाठी सोईचे होणार आहे. हद्दवाढ अभावी नवीन वस्त्यांमध्ये पाणीपुरवठा, स्वच्छता, दिवाबत्ती, रस्ते अशा मूलभूत सुविधांअभावी नागरीकांची गैरसोय होत होती. मात्र, आता हद्दवाढीच्या प्रस्तावास मान्यता मिळाल्याने वाढीव भागात नागरी सुविधा देण्याच्या अडचणी दूर होवून शहर विकासाला गती मिळणार असल्याचा विश्वास आ.श्वेता महाले यांनी व्यक्त केला आहे.