१५ उमेदवारांची अनामत रक्कम जप्त

बुलडाणा लोकसभा मतदार संघात एकूण १७ उमेदवारांपैकी १५ उमेदवारांची अनामत रक्कम जप्त

बुलडाणा : अपेक्षित मते न पडल्यामुळे रिंगणात असलेल्या १७ उमेदवारांपैकी १५ उमेदवारांना आपली अनामत गमवावी लागली. बुलडाणा लोकसभा मतदार संघात एकूण १७ उमेदवार रिंगणात होते. जवळपास १८ लाख १४ हजार ३७१ मतदारांपैकी ९ लाख ७१ हजार मतदारांनी आपल्या मतदानाचा हक्क बजावला होता. प्रत्येक उमेदवाराला आपली अनामत रक्कम राखण्यासाठी १ लाख ६३ हजार ३३ मतांची आवश्यकता होती. प्रतापराव जाधव आणि कृष्णराव इंगळे यांच्या व्यतिरिक्त एकही उमेदवार १ लाख मतांच्या आकड्यापर्यंत पोहचू शकला नाही. तिसर्‍या क्रमांकावर असलेले बहुजन समाज पक्षाचे उमेदवार अब्दुल हाफीज अब्दुल अजीज यांना ३३,७८३ मते मिळाली. तर अपक्ष उमेदवार बाळासाहेब दराडे हे केवळ २९,७९३ एवढय़ाच आकड्यापर्यंत येऊन पोहचले. दराडे हेच तिसर्‍या क्रमांकाची मते घेतील, विजयी उमेदवाराचे गणित दराडे ठरवतील, असे अंदाज व्यक्त केल्या जात होते. तथापि, हे सारे अंदाज चुकीचे ठरले. दराडेपेक्षा अब्दुल हाफीज यांनी जास्त मते घेतली. तर मागील निवडणुकीत बहुजन समाज पक्षाच्या हत्तीवर स्वार झालेले वसंतराव दांडगे हे समाजवादी पक्षाचे उमेदवार होते. त्यांनाही आपली अनामत रक्कम राखता आली नाही. दांडगे यांना जेमतेम २,७५0 मते पडली. आम आदमी पक्षाचे सुधीर सुर्वे यांना केवळ ३,४२९ मते पडली.