११८ पोलिस पाटलांवर १८२ गावांचा ताण

खामगाव व शेगाव तालुक्यात पोलिस पाटलांची तब्बल ६४ पदे रिक्त आहेत.

खामगाव: पोलिस यंत्रणा व महसूल विभागाचा ग्रामीण भागातील दुवा म्हणून काम पाहणार्‍या पोलिस पाटलांची खामगाव व शेगाव तालुक्यात तब्बल ६४ पदे रिक्त आहेत. रिक्त जागा असलेल्या गावांचे प्रभारी काम पाहताना या कार्यरत पोलिस पाटलांवर ताण पडत आहे. तर पोलिस पाटलांच्या रिक्त जागा भरतीबाबत शासनाने स्थगिती दिली आहे. ग्रामीण भागातील पारावर बसून ग्रामस्थांच्या तक्रारीचा न्यायनिवाडा करणार्‍या पोलिस पाटलांवर शासनाने अनेक कामे लादली आहे. गावातील किरकोळ वाद त्या ठिकाणीच मिटविण्यासाठी पोलिस पाटील यांची भूमिका महत्त्वाची ठरते. पूर्वीचा न्यायनिवाडा करणारा व गावात वेगळेच वलय असणारा पोलिस पाटील आता दुर्मीळ होऊ लागल्याची खंत व्यक्त होत आहे. अनेक शासकीय कामासाठी पोलिस पाटलाचे ओळखपत्र महत्त्वाचे ठरते. खामगाव उपविभागातील खामगाव व शेगाव तालुक्यात पोलिस पाटलांची १८२ पदे मंजूर आहेत. यापैकी ११८ ठिकाणी पोलिस पाटील कार्यरत आहेत, तर ६४ ठिकाणी अद्यापही ही पदे रिक्त आहेत. २0१२ मध्ये खामगाव उपविभागात पोलिस पाटलाची रिक्त पदे तातडीने भरण्याची प्रक्रिया सुरू असताना राज्यात पडलेल्या दुष्काळ निवारणार्थ शासनाने काही योजना हाती घेतल्या होत्या. पोलिस पाटील भरती प्रक्रियेमुळे दुष्काळ निवारणार्थ काम करण्यामध्ये उपविभागीय अधिकारी यांना अडचणी येऊ नयेत व दुष्काळ निवारणार्थ पुरेसा वेळ मिळावा याकरिता सुरू असलेल्या पोलिस पाटील भरती प्रक्रियेस शासनाने पुढील आदेश होईपर्यंत स्थगिती दिली होती; मात्र दीड वर्षाचा कालावधी उलटूनही पोलिस पाटलांच्या भरती प्रक्रियेबाबात शासनाने अद्यापही निर्णय घेतलेला नाही.