भंडारा : तालुक्यातील मोरगाव (शहापूर) येथील महाराष्ट्र मेटल पावडर कर्मचारी सहकारी पतसंस्थेत कराची रक्कम न भरणे व अन्य मुद्द्यांना घेऊन गैरप्रकार झाल्याची तक्रार पतसंस्थेचे संचालक लालाजी बारसागडे यांनी केली होती. या प्रकरणी आयकर विभागामार्फत पावतीच उपलब्ध झाल्याने सदर संस्थेत आयकराची ८४ हजार रूपयांची रक्कम भरल्याचे स्पष्ट झाले आहे. यासंदर्भात सहायक उपनिबंधकांनाही कळविण्यात आल्याचे संचालकांनी सांगितले.
माहितीनुसार, संस्थेचे संचालक लालाजी बारसागडे यांनी सदर पतसंस्थेत गैरप्रकार झाल्याची तक्रार सहायक निबंधकांकडे केली होती. या संस्थेचे अध्यक्ष, उपाध्यक्ष व व्यवस्थापकीय संचालक मंडळ दरमहा मासिक सभा घेतात. मात्र बारसागडे यांना चार सभांना बोलविले नाही तसेच सूचनाही दिली नाही, असे तक्रारीत नमूद होते. तसेच संस्थेने आयकर भरला नाही परंतु जमाखर्च पत्रकात मात्र ८४ हजार रुपये कराची नोंद केली असल्याचेही तक्रारीत म्हटले होते. यासंदर्भात सहाय्यक निबंधक सहकारी संस्था अंतर्गत अध्यक्ष, उपाध्यक्ष, सचिव यांना मिळालेल्या पत्रानुसार व त्यांनी दिलेल्या माहितीनुसार सदर संस्थेत कुठलाही गैरव्यवहार झाला नसल्याचे म्हटले आहे. बारसागडे यांनी केलेला आरोप धादांत खोटे असल्याचेही या संचालकांचे म्हणणे आहे. बारसागडे सभेमध्ये आल्यावर असभ्य वर्तणूक करीत असल्यामुळे २५ ऑगस्ट रोजी च्या सभेत चर्चा करून त्यांना बडतर्फ करण्यात आल्याचेही संचालकांनी सांगितले. त्यांची ८२ सभासदांनी त्यांच्याबाबत तक्रार केली होती. यात त्यांच्यावर कोणत्याही प्रकारचा विश्वास नाही, असे लेखी पत्रही संस्थेला दिले होते तसेच २०१९-२० च्या आर्थिक वर्षात संस्थेचे लेखापरीक्षक सात पैसे यांनी दिलेल्या सूचनेनुसार सन २०२०-२१ च्या अंदाजपत्रकात अंतर्गत आयकराची रक्कम ८४ हजार रुपये ३१ मार्च २०२० रोजी बँक ऑफ इंडियामध्ये जमा करण्यात आले आहे. याबाबत धनादेश क्रमांकासह चार्टर्ड अकाउंटंट फुंडे यांच्या सांगितल्याप्रमाणे ही भरण्यात आल्याचे माहितीत नमूद आहे. सदर रक्कम शासकीय कोषागारात भरणा केली असल्यानंतरही बारसागडे यांनी तक्रार सादर केल्याने प्रश्नचिन्ह उभे झाले, अशी माहिती संस्थेचे सभासद चंद्रभान कारेमोरे यांनी ‘लोकमत’शी बोलताना दिली.