दिघोरीत उभ्या धान पिकात सोडली जनावरे

लाखांदूर तालुक्यात यंदा आठ हजार हेक्टर क्षेत्रात उन्हाळी धानाची लागवड करण्यात आली. मध्यंतरी अवकाळी पाऊस व गारपीटही झाली. त्यामुळे धानपीक क्षतीग्रस्त होण्याची भीती निर्माण झाली होती. त्यातच धानावर करपा, कडाकरपा आदी किडींचा प्रादूर्भाव वाढत गेला. आता खोडकिडीने डोके वर काढले आहे.

ठळक मुद्देखोडकिड्यांचा प्रादूर्भाव : लॉकडाऊनने कीड नियंत्रणाला मजूर मिळेना

दयाल भोवते।
लोकमत न्यूज नेटवर्क
लाखांदूर : कोरोना प्रादूर्भावाच्या सावटात धान पिकावर मोठ्या प्रमाणात खोडकिडीने आक्रमण केले आहे. लॉकडाऊनने किड नियंत्रणासाठी मजूर मिळणे कठीण झाले आहे. अशा परिस्थितीत लाखांदूर तालुक्याच्या दिघोरी येथील एका शेतकऱ्याने चक्क धानाच्या पिकात जनावरे सोडली.
लाखांदूर तालुक्यात यंदा आठ हजार हेक्टर क्षेत्रात उन्हाळी धानाची लागवड करण्यात आली. मध्यंतरी अवकाळी पाऊस व गारपीटही झाली. त्यामुळे धानपीक क्षतीग्रस्त होण्याची भीती निर्माण झाली होती. त्यातच धानावर करपा, कडाकरपा आदी किडींचा प्रादूर्भाव वाढत गेला. आता खोडकिडीने डोके वर काढले आहे.
कीड नियंत्रण करणे आवश्यक असताना कोरोना प्रादूर्भाव प्रतिबंधासाठी लॉकडाऊन करण्यात आले. एकीकडे मजूर मिळत नाही आणि दुसरीकडे खोडकीड धान उद्ध्वस्त करीत आहे. निसवा होऊन लोंबी आलेल्या धानावर किडींचा प्रादूर्भाव वाढला आहे. हजारो रुपये खर्च करुनही पीक हातचे जाण्याची स्थिती निर्माण झाली आहे. मजूर मिळत नसल्याने शेतकरी हतबल झाला आहे.

एकरी ४० हजार मदत द्या
खोडकिडीने दिघोरी व बारव्हा परिसरातील उन्हाळी धान शेती बाधीत झाली आहे. उन्हाळी धानाचा निसवा होऊनही लोंब्या भरल्या नसल्याने हातात काही येण्याची शक्यता नाही. अशा स्थितीत शासनाने धान उत्पादक शेतकऱ्यांना ऐकरी ४० हजार रुपये मदत जाहिर करावी, अशी मागणी लाखांदूर पंचायत समिती सदस्य गुलाब कापसे यांनी केली आहे.