बीड : कोरोना महामारीत काम करूनही मागील दीड महिन्यापासून वेतन नाही. त्यातच आता अचानक कामावरून कमी केले जात असल्याने वॉर्डबॉय आक्रमक झाले होते. त्यांनी अतिरिक्त जिल्हा शल्यचिकित्सक डॉ. सुखदेव राठोड यांना घेराव घालत संताप केला. तसेच काहींनी जिल्हा शल्यचिकित्सकांकडेही तक्रारी केल्या आहेत.
जिल्ह्यात मागील काही दिवसांपासून कोरोनाबाधित रुग्णांची संख्या कमी होत आहे. त्यामुळे तीन महिन्यांसाठी कंत्राटी पद्धतीवर भरती केलेले कर्मचारी कमी केले जात आहेत. यात वॉर्डबॉयचाही समावेश आहे; परंतु एवढ्या महामारीत काम करूनही आरोग्य विभागाने वेळेवर वेतन दिले नाही. अचानक नोकरीवरून काढून टाकल्याने हे सर्व तरुण उघड्यावर पडले आहेत. अगोदर सर्व वेतन द्यावे आणि मगच कामावरून कमी करावे. कमी करताना नियमानुसारच करावे, कोणावरही अन्याय होणार नाही, याची काळजी घ्यावी, अशी मागणी या वॉर्डबॉयने केली होती. याच मुद्द्यांना धरून सर्व वॉर्डबॉय जिल्हा शल्यचिकित्सक डॉ. सुरेश साबळे यांच्याकडे गेले. तेथून आक्रमक होत डॉ. सुखदेव राठोड यांच्या कक्षात जाऊन त्यांना घेराव घातला. यावेळी त्यांनी आरोग्य विभागाबद्दलच आपला संताप व्यक्त केला.
---
वेतन का थकले याबाबत माहिती घेतो. आठवड्यात या सर्व वॉर्डबॉयचे वेतन दिले जाईल.
- डॉ. सुरेश साबळे, जिल्हा शल्यचिकित्सक, बीड.
--
मुख्य कार्यकारी अधिकारी यांच्या आदेशाप्रमाणे रुग्णसंख्या कमी झाल्याने कर्मचारी कमी केले जात आहेत. वॉर्डबॉयचे गैरसमज झाल्याने ते आक्रमक झाले होते.
- डॉ. सुखदेव राठोड, अतिरिक्त जिल्हा शल्यचिकित्सक, बीड.
---
वॉर्डबॉय भरतीत घोटाळा झालेला आहे. पैसे घेऊन भरती करण्यात आलेली आहे. आता वेतन न देताच त्यांना अचानक कामावरून कमी केले जात आहे. यातही दुजाभाव करून काही मुलांवर अन्याय केला जात आहे. याबाबत आपण जिल्हा शल्यचिकित्सक यांच्याकडे तक्रार केली आहे.
- दीपक थोरात, सामाजिक कार्यकर्ते, बीड.
===Photopath===
160621\16_2_bed_3_16062021_14.jpeg
===Caption===
अतिरिक्त जिल्हा शल्य चिकित्सक डॉ.सुखदेव राठोड यांच्या कक्षाबाहेर वॉर्डबॉयने अशाप्रकारे गर्दी केली होती.