साहेबांनी सांगितलेय.., अवैध धंदेवाल्यांना जाऊ द्या...!

लोकमत न्यूज नेटवर्क

माजलगाव

: लॉकडाऊन काळात येथील परभणी टी पाॅईंटवर ग्रामीण पोलिसांकडून वाहनधारकांची तपासणी सुरू आहे. या तपासणीमध्ये सर्वसामान्य नागरिकांची कसून चौकशी केली जात आहे, तर अवैध धंदेवाल्यांना ‘जाऊ द्या..., साहेबांनी सांगितले आहे...’, असे म्हणून सूट देण्यात येत असल्याचे निदर्शनास येत आहे.

लॉकडाऊन असल्याने शहरात शहर पोलीस ठाण्यासमोर वाहन तपासणी, तर ग्रामीण पोलीस ठाण्याकडून परभणी फाटा व सावरगाव येथे वाहन तपासणी करण्यात येते. येथे असणारे पोलीस अधिकारी व कर्मचारी वाहनधारकांना खरेच काम आहे का? वाहनांवर दंड आहे का? त्यांच्याकडे परवाना आहे का? अशी विचारणा केली जात आहे. कोरोना महामारीमुळे अगोदरच सर्व जनता मानसिक, आर्थिक, सामाजिक अशा सर्व बाजूंनी त्रस्त झालेली आहे. केव्हा काय होईल, याचा नेम नाही म्हणून प्रत्येक जण जीव मुठीत धरून जीवन जगत असल्याचे दिसून येत आहे.

अनेक लोक कुटुंबातील व्यक्तिंना घेऊन दवाखान्यात येतात. कोणाच्या घरी दुःखद घटना घडलेली असते, तर कोणी शेतीसाठी लागणारे बी-बियाणे, खते याकरिता गावातून वाहने घेऊन येतात. या सर्वांची तपासणी करून त्या नावावर बराच वेळ अडवणूक होत आहे. महिला, लहान मुले, असे कुटुंब असतांना बराच वेळ थांबवून ठेवण्यात येते, तर दुसरीकडे अवैध धंदे करणाऱ्या व्यक्ती थांबवल्या तर चौकात बसलेल्या साहेबांना फोन जातो लगेच... अरे जाऊ द्या..., साहेबांनी सांगितले आहे. असे म्हणून त्या व्यक्तीचे वाहन सोडण्यात येत असल्याचे रविवारी निदर्शनास आले. याच पद्धतीने वाळू वाहने व इतर हितसंबंध असणाऱ्यांची वाहने सर्रासपणे सोडली जातात. मात्र, खते आणि बी - बियाणे खरेदी करण्यासाठी येणारी शेतकऱ्यांची वाहने अडवली जात आहेत. परवाना व कागदपत्रे, अगोदरचा दंड या नावावर दंडाच्या पावत्या फाडून घळाटवाडी ग्रामपंचायत कार्यालयात पैसे जमा करण्यात येत आहेत. या ठिकाणी सर्वसामान्य नागरिकांना एक न्याय, तर अवैध धंदे करणाऱ्यांना दुसरा न्याय असा प्रकार सर्रासपणे सुरू आहे. याबाबत वरिष्ठांनी तत्काळ दखल घ्यावी, अशी मागणी होत आहे.

....

सर्वसामान्य जनतेला असा त्रास दिला जात नाही. जनतेला असा त्रास व्हायला नको. असा काही प्रकार होत असेल, तर माहिती घेऊन चौकशी करू.

- सुरेश पाटील, उपविभागीय पोलीस अधिकारी, माजलगाव.

===Photopath===

300521\purusttam karva_img-20210530-wa0024_14.jpg~300521\purusttam karva_img-20210530-wa0022_14.jpg

===Caption===

लॉकडाऊन काळात येथील माजलगाव येथील परभणी टी पाँईंटवर ग्रामीण पोलिसांकडून वाहनधारकांची तपासणी सुरू आहे. याचा सर्वसामान्यांनाच संताप होत आहे.~