बीड : म्युकरमायकोसिसच्या रुग्णांवर आतापर्यंत अंबाजोगाईच्या स्वाराती वैद्यकीय महाविद्यालयात शस्त्रक्रिया केल्या जात होत्या; परंतु आता यापुढे जिल्हा रुग्णालयातच शस्त्रक्रिया केल्या जाणार आहेत. यासाठी तीन खाजगी डॉक्टरांची मदत घेतली आहे. तसेच सरकारी डॉक्टरही यासाठी सज्ज आहेत. शस्त्रक्रियागृहासह ओपीडी आणि स्वतंत्र कक्षही तयार करण्यात आला आहे. बुधवारी याबाबत जिल्हा शल्यचिकित्सक डॉ. सुरेश साबळे यांनी बैठकही घेतली.
जिल्ह्यात दिवसेंदिवस म्युकरमायकोसिसचे रुग्ण वाढत आहेत. सध्याही रुग्णसंख्या दीडशेपार गेली आहे. या सर्व रुग्णांवर अंबाजोगाईच्या स्वाराती वैद्यकीय महाविद्यालयात उपचार आणि शस्त्रक्रिया केल्या जात होत्या; परंतु ही सुविधा बीड जिल्हा रुग्णालयात उपलब्ध व्हावी, यासाठी तत्कालीन जिल्हा शल्यचिकित्सक डॉ. सूर्यकांत गित्ते यांनी प्रस्ताव तयार केला होता. याला डॉ.साबळे यांच्या कार्यकाळात मंजुरी मिळाली आहे. जिल्हा रुग्णालयात दंत व कान, नाक व घसा असे तज्ज्ञ नसल्याने खाजगी डॉक्टरांची मदत घेतली असून, त्यांना शस्त्रक्रियेनुसार मानधन दिले जाणार आहे. तसेच या रुग्णांचे निदानही बीडमध्येच होणार आहे. जिल्हा रुग्णालयात या रुग्णांसाठी जुना प्रसूती वॉर्डमध्ये ३० खाटा राखीव ठेवल्या आहेत. तसेच फिव्हर क्लिनिकमध्येच ओपीडी तयार केली आहे. येथे संशय वाटल्यास तो वॉर्डात पाठविला जाणार आहे. यामुळे जिल्हावासीयांना समाधान मिळाले आहे.
वैद्यकीय तज्ज्ञांसोबत सीएसची बैठक
जिल्हा शल्यचिकित्सक डॉ.सुरेश साबळे यांनी म्युकरमायकोसिससंदर्भाने बुधवारी दुपारी बैठक घेतली. यावेळी अतिरिक्त जिल्हा शल्यचिकित्सक डॉ.सुखदेव राठोड, समन्वयक डॉ.अशोक हुबेकर, डॉ.बाबासाहेब ढाकणे, डॉ.सचिन आंधळकर आदींची उपस्थिती होती.
ही टीम करणार म्युकरमायकोसिसवर काम
डॉ.सुखदेव राठोड, डॉ.अशोक हुबेकर, डॉ. अभिषेक जाधव, डॉ.चंद्रकांत वाघ, डॉ.मीनाक्षी साळुंके, डॉ.रेवडकर, डॉ.अर्जुन तांदळे, डॉ.संतोष जैन, डॉ.जयश्री बांगर, डॉ.सबा, डॉ.अजय राख, जयश्री उबाळे, पळशीकर, तानाजी ठाकर, उज्ज्वला गावडे, रूपाली सुलाखे ही टीम म्युकरमायकोसिसचे काम पाहणार आहे. डॉ.सचिन चोले, डॉ.सुधाकर बीडकर आणि डॉ.अशोक उनवणे हे खाजगी डॉक्टर मदतीला असणार आहेत.
--
म्युकरमायकोसिससंदर्भात बैठक झाली आहे. गुरुवारपासून प्रत्यक्ष उपचार आणि शस्त्रक्रियांना सुरुवात होईल. सर्व यंत्रणा आणि वैद्यकीय तज्ज्ञ तयार आहेत. लवकरच पहिली शस्त्रक्रिया होईल.
डॉ.सुरेश साबळे, जिल्हा शल्यचिकित्सक, बीड
===Photopath===
160621\16_2_bed_8_16062021_14.jpeg~160621\16_2_bed_7_16062021_14.jpeg
===Caption===
जिल्हा रूग्णालयात शस्त्रक्रिया गृह सज्ज झाले आहे.~जिल्हा शल्य चिकित्सक डॉ.सुरेश साबळे यांनी म्युकरमायकोसिस संदर्भात अधिकारी, डॉक्टर, कर्मचाऱ्रूांची बैठक घेतली.