शिरूर कासार : तालुक्यातील गोमळवाडा येथे शुक्रवारी दोन गटांत झालेल्या मारहाणप्रकरणी मारहाण तसेच विनयभंग असे दोन परस्पर विरोधी गुन्हे दाखल करण्यात आले आहेत. दोन्ही गुन्ह्यांतील आरोपी अद्यापही मोकाटच आहेत.
सामाजिक कार्यकर्ते अजिनाथ गवळी आणि त्यांचे वडील यांना ‘आमच्या विरोधातील लोकांना मदत का करतो? ’ या कारणावरून गावातीलच पांडुरंग सोनाजी कातखडे, शारदा पांडुरंग कातखडे, सचिन पांडुरंग कातखडे, पवन कचरू गवळी आणि प्रवीण कचरू गवळी यांनी शुक्रवारी कुऱ्हाडीने हल्ला करून गंभीर जखमी केले, अशी फिर्याद आदिनाथ गवळी यांनी दिल्याने गुन्हा दाखल करण्यात आला आहे.
याच प्रकरणात महिलेचा विनयभंग केल्याच्या फिर्यादीवरून आरोपी अजिनाथ मारुती गवळी, मारोती रंगनाथ गवळी आणि राहुल मारोती गवळी हे घरात घुसले. त्यांनी ‘आमच्यावर केस का केलीस’ असे म्हणून मारहाण करण्यास सुरुवात केली. अजिनाथ गवळी याने वाईट हेतूने हात धरून झटापट करून विनयभंग केला. सून सोडवण्यास आली असता तिलादेखील मारहाण करण्यात केली. आरडाओरडा ऐकून लोक जमा झाल्याने आरोपीने तेथून काढता पाय घेतला अशा आशयाची फिर्याद महिलेने दिल्याने पोलिसांत विनयभंगाचा गुन्हा दाखल झाला आहे. परस्परविरोधी गुन्हे दाखल झाल्यानंतर या प्रकरणाचा तपास पोलीस उपनिरीक्षक आर. पी. सानप करीत आहेत.