लोकमत न्यूज नेटवर्क
केज : चंदनसावरगाव जवळबन पावनधाम हा रस्ता मागील दहा वर्षांपासून जागोजागी खड्डे पडून खराब झाला आहे. या रस्त्याच्या मागणीसाठी अनेकवेळा निवेदन देण्यासह आंदोलने करूनही रस्त्याची दुरवस्था कायम असल्याने सोमवारी केज तहसील कार्यालयासमोर या रस्त्याच्या मागणीसाठी लक्षवेधी धरणे आंदोलन करण्यात आले
तालुक्यातील जवळबनकडे जाणारे तिन्ही मुख्य रस्ते प्रचंड मोठ्या प्रमाणात खड्डे पडून खराब झाले आहेत. गावातील नागरिकांना, वाहनधारकांना, महिलांना, आबालवृद्धांना रस्त्यावरून प्रवास करताना मोठी कसरत करावी लागते. सध्या पावसाळ्यात तर कोणत्याही रस्त्याने जाणे मुश्कील बनले आहे. स्थानिक स्वराज्य संस्थांचे लोकप्रतिनिधी, आमदार, पालकमंत्री, खासदार, जिल्हा प्रशासन मूग गिळून जाणीवपूर्वक दुर्लक्ष करत असल्याने अनेक वर्षांपासून जटिल बनलेल्या रस्त्याची कायमस्वरूपी समस्या सोडवून घेण्यासाठी सर्वसामान्य नागरिकांना सोबत घेऊन स्वाभिमानी शेतकरी संघटनेचे जिल्हाध्यक्ष कुलदीप करपे यांच्या नेतृत्वाखाली सोमवारी ग्रामस्थांच्या उपस्थितीत केज तहसीलसमोर लक्षवेधी धरणे आंदोलन करण्यात आले.
चंदनसावरगाव-जवळबन-पावनधान-बोरीसावरगाव रस्ता मुख्यमंत्री ग्राम सडक योजनेतून मंजूर झाला होता. मात्र, गतवर्षी कोरोना संकटात शासनाने सदर रस्ता रद्द केला. या रस्त्याला नव्याने मंजुरी द्यावी. सावळेश्वर -जवळबन डिघोळआंबा-कानडीबदन या रस्त्यांना तत्काळ स्थानिक स्वराज्य संस्थेतून मान्यता द्यावी आदी मागण्या आंदोलकांनी केल्या आहेत. १० दिवसांच्या आत या मागण्या मान्य कराव्यात, अन्यथा अंबाजोगाई-कळंब राज्य महामार्गावर बेमुदत तीव्र स्वरूपात चक्का जाम आंदोलन करण्याचा इशारा यावेळी देण्यात आला.
या आंदोलनात स्वाभिमानी शेतकरी संघटनेचे बीड जिल्हाध्यक्ष कुलदीप करपे, जिल्हा उपाध्यक्ष प्रमोद पांचाळ, लहू गायकवाड, सुग्रीव करपे, सरपंच शिवाजी शिंपले, संदीप करपे, दिगंबर, श्रीधर भाकरे, अशोक साखरे, दत्ता साखरे, बालासाहेब करडकर, सुंदरराव साखरे, प्रवीण करपे, अविनाश करपे, पदमाकर करपे, दयानंद करपे, परसराम करपे, सुनील जोगदंड, अमोल करपे, विकास करपे, शिवाजी भाकरे, संदीप भाकरे, अंबादास करपे आदींसह ग्रामस्थ उपस्थित होते. या धरणे आंदोलनाला संभाजी ब्रिगेडचे तालुकाध्यक्ष कैलास चाळक, शेकापचे भाई मोहन गुंड आदींनी पाठिंबा दिला. नायब तहसीलदार धस यांनी आंदोलकांचे निवेदन स्वीकारले.
050721\img_20210705_114854.jpg
रस्त्याच्या मागणीसाठी केज तहसील कार्यालया समोर स्वाभिमानी शेतकरी संघटनेचे जिल्हाध्यक्ष कुलदीप करपे यांच्या नेतृत्वाखाली लक्षवेधी धरणे आंदोलन करण्यात आले यावेळी जवळबन येथील ग्रामस्थ मोठ्या संख्येने उपस्थित होते.