लोकमत न्यूज नेटवर्क
धारूर : धारूर व केज येथे सिलिंडर घरपोहोच करणारी एकच एजन्सी आहे. पंधरा हजारांपेक्षा जास्त ग्राहक आहेत. १६ डिलिव्हरी बॉईज घरपोच सिलिंडर पोहोच करण्याचे काम करतात. मात्र, यापैकी आठ डिलिव्हरी बॉईजनी कोरोना प्रतिबंधात्मक लस घेतली आहे. आणखी आठ डिलिव्हरी बॉईज लसीकरणापासून वंचित आहेत. यातील एजन्सीच्या तीन डिलिव्हरी बॉईजनी कोरोनावर मात केली आहे.
गॅस एजन्सीचे व्यवस्थापन धारूर कार्यालयातून सांभाळले जाते. कोरोनाकाळात नागरिकांना वेळेवर गॅस घरपोच मिळवा, यासाठी १६ डिलिव्हरी बॉईज नियुक्त केले आहेत. पंधरा हजारांपेक्षा जास्त ग्राहक आहेत. घरपोच गॅस सिलिंडर पोहोच करणाऱ्या १६ डिलिव्हरी बॉईजसह सर्व ३० जण या एजन्सीत कार्यरत आहेत. यातील घरपोच सिलिंडर पोहोच करणाऱ्या डिलिव्हरी बॉईजच्या आरोग्य व सुरक्षिततेला जास्त महत्व दिले जाते. हे कर्मचारी मास्क, सॅनिटायजर वापरतात. यापैकी पन्नास टक्के म्हणजे आठ डिलिव्हरी बॉईजचे लसीकरण करण्यात आले आहे. कार्यालयीन कर्मचारीवर्गाचे लसीकरण झाले असून, राहिलेल्या कर्मचारी वर्गाच्या लसीकरणासाठी आरोग्य विभागाकडे पाठपुरावा करण्यात येत असल्याचे एजन्सीचे व्यवस्थापक सुनील भोसले यांनी सांगितले.
...
सिलिंडर सॅनिटाईज केले जाते
गॅस सिलिंडर घरपोच करणाऱ्यांपैकी तीन डिलिव्हरी बॉईज कोरोना पॉझिटिव्ह आले होते. त्यांनी कोरोनावर मात केली आहे. ते सध्या होम क्वारंटाईन आहेत. सिलिंडर घर पोहोच करताना एजन्सीकडून ग्राहक व कर्मचारी दोघांच्याही सुरक्षिततेची काळजी घेतली जाते. डिलिव्हरी बॉईज मास्क, सॅनिटायझर वापरतात. हॅण्डग्लोव्हज वापरतात. ग्राहकांच्या घरात सिलिंडर ठेवताना ते सॅनिटाईज करून ते दिले जाते, असेही सुनील भोसले यांनी सांगितले.
....
लसीकरणासाठी आरोग्य विभागास पत्रव्यवहार
गॅस एजन्सीच्या डिलिव्हरी बॉईजचा थेट ग्राहकांशी संबंध येतो. यामुळे या डिलिव्हरी बॉईजचे लसीकरण व्हावे. त्यांची व नागरिकांची दोघांच्या सुरक्षिततेचा विचार करून आरोग्य विभागास गॅस एजन्सीकडून यादी घेऊन त्यांचे प्राधान्याने लसीकरण करावे, असे पत्र आरोग्य विभागास दिल्याचे नायब तहसीलदार रामेश्वर स्वामी यांनी सांगितले.
....
डिलिव्हरी बॉईज म्हणतात...
नागरिकांची गैरसोय होऊ नये म्हणून घरपोहोच गॅस सिलिंडर देण्याचे काम करतो. आमच्या एजन्सीमधील केज येथे काम करणाऱ्या सहकाऱ्यास लस मिळाली. तशी आम्हाला तत्काळ लस देऊन आमचे व आमच्या कुटुंबाचे रक्षण करावे.
- दत्ता सिरसट, धारूर.
...
गेल्या चौदा महिन्यांपासून गॅस ग्राहकांची सोय व्हावी, यासाठी आम्ही घरपोहोच सिलिंडर देत आहोत. एजन्सीकडून जिल्हाधिकाऱ्यांना लसीकरणाबाबतचे पत्र देऊन यादी दिली आहे. आरोग्य विभागाने आमची सेवा व संपर्क पाहून आम्हाला तत्काळ लस द्यावी.
-शेख अन्वर, धारूर.