वडाळीतील अवैध दारु विक्री थांबविणार कोण?

वडाळी येथील देशी दारु विक्रीच्या दुकानाला कायम हद्दपार करण्यासाठी आंदोलक महिलांना १० महिन्यांनंतर यश मिळाले.

अमरावती : वडाळी येथील देशी दारु विक्रीच्या दुकानाला कायम हद्दपार करण्यासाठी आंदोलक महिलांना १० महिन्यांनंतर यश मिळाले. मात्र, परिसरातील काही भागात सुरु असलेल्या अवैध देशी आणि गावठी दारुविक्रीला कोण थांबविणार? असा सवाल आता उपस्थित होत आहे. वडाळी परिसर दारुमुक्त करण्याचा निर्धार महिलांनी केला असून आता अवैध दारुविक्रीला लगाम लावण्यासाठी पोलिसांवर दबावतंत्र निर्माण केले जाणार असल्याची माहिती आहे.
वडाळीतील काही भागात दोन, चार घरे सोडून राजरोसपणे अवैध दारु विक्री होते. खरे तर अवैध दारुविक्री रोखण्याचे काम राज्य उत्पादन शुल्क विभाग आणि पोलिसांचे आहे. मात्र, गत १० महिन्यांपासून येथील देशी दारु विक्रीचे दुकान बंद असल्याचा अवैध दारु विक्रेत्यांनी पुरेपूर लाभ घेतला. परिसरात या काळात मोठ्या प्रमाणात गावठी दारुविक्री सुरू झाली आहे. महिलांनी धनाढ्य शक्तीविरुद्ध लढा देऊन देशी दारुविक्रीचे दुकान बंद करुन इतिहास रचला. परंतु आता त्यांना वडाळी येथे सुरु असलेल्या गावठी दारुविक्रेत्यांविरुद्ध नव्याने लढा पुकारावा लागणार आहे. या लढाईत वडाळीतील महिलांना स्वकीयांसोबत दोन हात करावे लागतील. परिसरातील प्रबुद्धनगर, परिवारपुरा व शिख मोहल्ला भागात मोठ्या प्रमाणात अवैध देशीआणि गावठी दारु विक्रीचे थैमान सुरू आहे. या भागात होत असलेल्या अवैध दारु विक्रीची इंत्यभूत माहिती पोलिसांनी आहे. कोणत्या घरी, कोण अवैध दारु विक्री करतात, याची बारीकसारीक माहिती पोलीस व राज्य उत्पादन शुल्क विभागाला आहे. मात्र चिरिमीरी करुन सुरु असलेली अवैध दारु विक्री थांबविण्यासाठी पोलीस स्वत: पुढाकार घेणार नाही, ही काळ्या दगडावरची रेघ आहे. वडाळीत अवैधरित्या विकल्या जाणारी दारु बंद केली तर अतिरिक्त कमाईवर लगाम लागेल? त्यापेक्षा तक्रार येत नाही तोपर्यंत अवैध दारु विक्री सुरु ठेवून पोलीसही मूकपणे हे सर्व बघतील, यात कोणतीही शंका नाही. न्यायालयात प्रकरण असताना प्रशासनाला जेरीस आणले. असे असताना पोलिसांनी वडाळीत अवैध दारु विक्रीचा वाद उफाळण्यापुर्वीच कारवाई करुन दारु विक्रीला कायम लगाम लावले तर बरे होईल, अन्यथा ज्या अवैध दारु विक्रेत्यांकडून पैसे वसुलीकरण्यासाठी पोलिस जातात त्यांच्यावर हल्ले होण्याची दाट शक्यता आहे.