‘स्थगिती’वरून गदारोळ

आमसभा स्थगित करण्याच्या मुद्यावरून मंगळवारी महापालिकेत गदारोळ झाला. भाजप-सेना, बसपा-रिपाइं, राष्ट्रवादी फ्रंट एका बाजूने तर दुसऱ्या बाजूने काँग्रेस-राष्ट्रवादी यांच्यात जुंपली. गदारोळ सुरू

मित्र बनले शत्रू : गटनेता पदाच्या घोषणेवरुन राजकारण
अमरावती : आमसभा स्थगित करण्याच्या मुद्यावरून मंगळवारी महापालिकेत गदारोळ झाला. भाजप-सेना, बसपा-रिपाइं, राष्ट्रवादी फ्रंट एका बाजूने तर दुसऱ्या बाजूने काँग्रेस-राष्ट्रवादी यांच्यात जुंपली. गदारोळ सुरू असताना पीठासीन सभापती उपमहापौर नंदकिशोर वऱ्हाडे यांनी राष्ट्रवादी काँग्रेसचे गटनेता म्हणून सुनील काळे यांच्या नावाची घोषणा केली. या घोषणेवर आक्षेपही नोंदविला गेला.
डॉ. बाबासाहेब आंबेडकर सभागृहात मंगळवारी पार पडलेल्या आमसभेत पीठासीनावर महापौर वंदना कंगाले, उपमहापौर नंदकिशोर वऱ्हाडे, आयुक्त अरूण डोंगरे, नगरसचिव मदन तांबेकर हे विराजमान होते.
आमसभेच्या प्रारंभीच भाजपाचे गटनेता संजय अग्रवाल यांनी केंद्रीय ग्रामविकास मंत्री व भाजपाचे नेते गोपीनाथ मुंडे यांच्या श्रध्दांजलीचे प्रस्ताव मंजूर करून सभा स्थगित करावी, असा प्रस्ताव मांडला. या प्रस्तावाला अविनाश मार्डीकर, प्रशांत वानखडे, चेतन पवार, बाळू भुयार, मिलिंद बांबल यांनी अनुमोदन दिले. मात्र सभा स्थगित करण्याच्या मुद्यावरून सुनील काळे यांनी आक्षेप घेतला. तेव्हा भाजप-सेना, रिपाइं, बसपा, जनविकास काँग्रेसचे सदस्य महापौरांच्या पीठासनासमोर एकत्र येऊन सभा स्थगित करण्याची मागणी करू लागले. एका बाजूने कामकाज सुरू रहावे तर दुसऱ्या बाजूने सभा स्थगित व्हावी हा वाद अर्धा तासपर्यंत सुरूच राहिला. अखेर महापौर वंदना कंगाले यांनी दहा मिनिटांसाठी सभा तहकूब करण्याचा निर्णय घेतला. महापौर कंगाले यांनी सभागृह सोडताच पाच ते सात मिनिटांच्या आत पीठासीनावर उपमहापौर नंदकिशोर वऱ्हाडे विराजमान झाले. त्यांनी स्वत:हून कामकाज सुरू केले.
गोंधळ सुरू असताना विभागीय आयुक्तांकडून आलेल्या पत्राचे त्यांनी वाचनही केले. दरम्यान गोपीनाथ मुंडे यांच्या श्रद्धांजली प्रस्तावावर चर्चेत तुषार भारतीय, प्रकाश बनसोड, चेतन पवार, विलास इंगोले, अविनाश मार्डीकर, सुनील काळे, विजय नागपुरे, राजेंद्र तायडे, कांचन ग्रेसपुंजे, दीपक पाटील, रीना नंदा, सुजाता झाडे, वंदना हरणे, प्रशांत वानखडे, बबलू शेखावत यांनी सहभाग घेत मुंडे यांच्या कार्यकर्तुत्वाचा लेखाजोखा मांडला. या प्रस्तावानंतर सभा स्थगित करण्यात आली.