फोटो - चिखलदरा ०३ एस
मुख्यमंत्री ग्राम सडक योजनेच्या सिमेंट रस्त्यात मातीमिश्रित रेतीचा वापर, ग्रामपंचायत पदाधिकाऱ्यांकडून पंचनामा
लोकमत विशेष
चिखलदरा : मेळघाटात सुरू असलेल्या मुख्यमंत्री ग्राम सडक योजनेत मध्य प्रदेशतील कंत्राटदाराकडून मोठ्या प्रमाणात नियमाला तिलांजली देत कोट्यवधी रुपयांची कामे सुरू असल्याचा प्रकार उघड झाला आहे. या सिमेंट रस्त्यामध्ये दगड-धोंडे आणि नदी-नाल्यांतील मातीमिश्रित रेतीचा वापर करण्यात आल्याची तक्रार आदिवासी गावकऱ्यांनी ग्रामपंचायतकडे केल्यावर सरपंच, उपसरपंचांनी सदर कामाची पाहणी केली. कंत्राटदार आणि अधिकाऱ्यांविरुद्ध कारवाईची मागणी त्यांनी केली आहे.
मेळघाटातील अतिदुर्गम असलेल्या आदिवासी भागात मध्य प्रदेशातील राजेंद्रसिंह किल्लेदार प्रायव्हेट लिमिटेड कंट्रक्शन कंपनी या कंत्राटदाराकडून पंतप्रधान आणि मुख्यमंत्री ग्राम सडक योजनेची विविध मार्गावरील रस्त्यांची कामे केली जात आहेत. संबंधित कंत्राटदार शासकीय अभियंत्यांना हाताशी धरून कोट्यवधीच्या कामांवर नियम धाब्यावर बसविला जात असल्याचा प्रकार वारंवार समोर आला आहे. तरीदेखील संबंधित अभियंत्यांनी त्यावर कुठलीही कारवाई केली नाही, हे विशेष.
बॉक्स
आदिवासी ग्रामस्थ धडकले
परतवाडा ते धारणी मार्गावरील तालुक्यातील घटांग हे मुख्य गाव असून, तेथून भुलोरी ते लवादा या दुर्गम गावासाठी सिमेंट रस्त्याचे काम सुरू आहे. कोट्यवधी रुपयांच्या या कामात संबंधित कंपनीकडून मातीमिश्रित रेती आणि सिमेंट रस्त्यांमध्ये मोठे दगड, धोंडे टाकले जात असल्याचा प्रकार आदिवासी गावकऱ्यांच्या लक्षात येताच त्यांनी सरपंच साबूलाल बेठे, उपसरपंच दीपेश बेलकर तसेच ग्रामपंचायत सदस्यांच्या निदर्शनास हा प्रकार आणला.
------------
कोट्यवधीची कामे, अभियंता बेपत्ता
मध्य प्रदेशच्या कन्स्ट्रक्शन कंपनीवर मुख्यमंत्री व पंतप्रधान ग्राम सडक योजनेच्या अधिकाऱ्यांची जरब नाही. देखरेखीसाठी असलेले शासकीय अभियंता कामाची पाहणी करीतच नसल्याचे ग्रामस्थ सांगतात. त्यामुळे निकृष्ट कामाची मालिका येथे सुरू आहे.
-------------
भुलोरी ते लवादा सिमेंट रस्त्यावर मोठ्या प्रमाणात दगड-धोंडे आणि नदी-नाल्याच्या मातीमिश्रित रेतीचा वापर केली जात असल्याचा प्रकार प्रत्यक्ष भेट दिल्यावर उघड झाला. संबंधितांवर कारवाईची मागणी केली आहे.
- साबूलाल बेठे, सरपंच, भुलोरी
कोट
संबंधित कामासंदर्भात माहिती घेऊन प्रत्यक्ष तपासणी करण्यात येईल. योग्य साहित्य आणि कामाचा दर्जा यावर स्वतः तपासणी करू.
- आय. आय. खान, कार्यकारी अभियंता, मुख्यमंत्री ग्रामसडक योजना, अमरावती
---------
फोटो कॅप्शन : चिखलदरा तालुक्यातील भुलोरी, लवादा या मार्गावर मुख्यमंत्री ग्राम सडक योजनेच्या कोट्यवधी रुपयांच्या कामात दगडधोंडे मातीमिश्रित रेतीचा वापर केल्या जात असल्याचा प्रकार सरपंच बाबूलाल बेठे उपसरपंच दीपेश बेलकर ग्रामपंचायत सदस्य गावकऱ्यांनी उघड आणून निकृष्ट काम करणाऱ्या वर कारवाईची मागणी केली आहे