सार्वजनिक बांधकाम मंत्र्यांच्या हस्ते प्रकल्पाचा प्रारंभ, आदिवासी विद्यार्थी डॉक्टर, अभियंते घडविण्याचा निर्धार
अमरावती : आदिवासी विकास विभागाने डोंगरी, दुर्गम भागातील आदिवासी विद्यार्थ्यांना डॉक्टर, अभियंते होता यावे, यासाठी मिशन नीट, जेईई उपक्रमांची पायाभरणी केली आहे. नीट, जेईई शिकवणींचा खर्च ‘ट्रायबल’ उचलणार आहे. नाशिक, ठाणे, अमरावती व नागपूर अप्पर आयुक्त कार्यालयअंतर्गत २५ एकात्मिक प्रकल्पांत दहावी, बारावीतील विज्ञान शाखेत शिकणाऱ्या विद्यार्थ्याना याचा लाभ मिळणार आहे.
‘मिशन नीट, जेईई २०२१’ या प्रकल्पाच्या पहिल्या टप्पाचा प्रजासत्ताकदिनी किनवट प्रकल्प कार्यालयाने नांदेड येथून माजी मुख्यमंत्री तथा सार्वजनिक बांधकाम मंत्री अशोक चव्हाण यांच्या हस्ते ऑनलाईन प्रारंभ करण्यात आला. यावेळी नांदेडचे जिल्हाधिकारी विपीन इटणकर, आदिवासी विकास विभाग अमरावतीचे अप्पर आयुक्त विनोद पाटील, जिल्हा परिषद अध्यक्षा मंगाराणी अंबुलगेकर, आमदार बालाजी कल्याणकर, मोहन हंबर्डे, आरसीसीचे मोटेगावकर, आदी ऑनलाईन उपस्थित होते.
या उपक्रमाचे संकल्पक साहाय्यक जिल्हाधिकारी तथा प्रकल्प अधिकारी कीर्तिकिरण पूजार यांनी प्रास्ताविक केले. अमोल मेटे यांनी संचालन केले.
बॉक्स
पथदर्शी प्रकल्प ठरणार
राज्यात दहावी, बारावीच्या आदिवासी विद्यार्थ्यांसाठी नीट, जेईई मार्गदर्शन प्रकल्पाचा प्रारंभ झाला. हा प्रकल्प राज़्यात पथदर्शी ठरेल, असा आशावाद पाहुण्यांनी मनोगतातून व्यक्त केला. गत काही दिवसांपूर्वी मेळघाटातील १३ आदिवासी विद्यार्थी एमबीबीएस शिक्षणासाठी पात्र ठरले. या विद्यार्थ्यांनी ‘नीट’ परीक्षा देऊन डॉक्टर होण्याचा मार्ग शोधला. अशाच प्रकारे मिशन नीट, जेईईदेखील आदिवासी विद्यार्थ्यांसाठी आशेचा किरण ठरणार असल्याचे आदिवासी विकास विभागाचे अप्पर आयुक्त विनोद पाटील यांनी ‘लाेकमत’ला सांगितले.