अचलपूर : पाच दिवसांच्या नवजात मुलीचे दोन्ही पाय पकडून तिला बेडवर आपटल्याची अमानुष घटना सायन (मुंबई) येथे घडली. याप्रकरणी सुलतानपुरा येथील ३१ वर्षीय माहेरवासिनीच्या तक्रारीवरून सरमसपुरा पोलिसांनी आरोपी समी महेंद्र व्हटकर, महेंद्र तुकाराम व्हटकर, प्रतीक महेंद्र व्हटकर, महेश व्हटकर व एक महिला (सर्व रा. व्ही.एन. पुरव मार्ग, मुंबई) यांच्याविरुद्ध गुन्हा दाखल करण्यात आला.
सुलतानपुरा येथील एका मुलीचे सायन येथील समी व्हटकर याचेशी सन २०११ मध्ये लग्न झाले. लग्नानंतर पतीसह सासरच्या मंडळीने हुंड्याची मागणी केली. त्यानंतर पीडिताला मुलगी झाल्याने छळ वाढला. त्या नवजात मुलीला आम्ही दहाव्या माळ्यावरून फेकून देऊ, तिला मारून टाकू, ही कशाला जन्माला आली, असे म्हणून सासरा महेंद्र व्हटकर याने त्या ५ दिवसांच्या मुलीचे दोन्ही पाय पकडून बेडवर आपटले. तिच्या बचावाकरिता पीडिता गेली असता, तिला व मुलीला जिवे मारण्याची धमकी देण्यात आली. सदर प्रकरण महिला सेललादेखील पाठविण्यात आले. मात्र, तेथे समझोता न झाल्याने पोलीस ठाण्यात तक्रार दाखल करण्यात आली. त्या तक्रारीवरून पोलिसांनी गुन्हा नोंदविला.