नांदगाव पेठ/ अमरावती : नजीकच्या रामगाव ते टाकळी मार्गावर एका युवकाने कडुनिंबाच्या झाडाला गळफास घेऊन आत्महत्या केली. मंगळवारी पहाटे सहाच्या सुमारास ही घटना उघडकीस आली. अनुभव अरुण धाकडे (३२, रा. मातोश्री रमाबाई आंबेडकरनगर, अमरावती) असे मृताचे नाव आहे. आत्महत्येचे नेमके कारण समजू शकले नाही. मात्र, प्रेयसीने अन्य व्यक्तीशी साखरपुडा केल्याने, आपण आत्महत्या करीत असल्याची सुसाईड नोट त्याचेजवळ मिळाल्याची माहिती पोलीस सुत्रांनी दिली.
मंगळवारी सकाळी ६ च्या सुमारास काही शेतकरी शेतात जात असताना रामगाव ते टाकळी मार्गावरील एका कडुनिंबाच्या झाडाला एक युवक लटकलेल्या अवस्थेत दिसला. घटनास्थळावरील नागरिकांनी नांदगाव पेठ पोलिसांना याबाबत माहिती दिली. पोलिसांनी तातडीने घटनास्थळ गाठून पंचनामा केला.
अनुभव धाकडे हा सोमवार रात्रीपासून तो घरून बेपत्ता होता. तो रामगावला कोणत्या उद्देशाने आला व आत्महत्येचे पाऊल का उचलले, याबाबत अनेक चर्चा झडल्या. गाडगेनगर पोलीस ठाण्यात अनुभव याच्याविरुद्ध विनयभंगाचा गुन्हा दाखल होता, अशी माहितीदेखील मिळाली. पोलिसांनी आकस्मिक मृत्यूची नोंद घेतली तथा शव उत्तरीय तपासणीसाठी जिल्हा सामान्य रुग्णालयात नेले. घटनेबाबत कुटुंबीयांना माहिती मिळताच त्यांनी एकच आक्रोश केला.