जास्त मुली कोण पटवणार? आरोपींची मैत्री तुटली अन् अमरावतीतील अश्लील व्हिडिओचं रॅकेट आलं समोर

अमरावती अश्लील व्हिडीओ प्रकरणात आरोपींबाबत धक्कादायक खुलासा झाला आहे.

Amravati Crime: संपूर्ण राज्याला हादरवून सोडणाऱ्या परतवाडा व्हिडीओ कांडाचा तपास जसजसा पुढे जात आहे, तसतसे धक्कादायक खुलासे समोर येत आहेत. मुख्य आरोपी अयान अहमद याने हे कृत्य कोणत्याही गुन्हेगारी फायद्यासाठी किंवा क्रिमिनल अॅक्सेस साठी केले नसून केवळ स्वतःच्या विकृत अय्याशीसाठी केल्याचे अत्यंत संतापजनक निरीक्षण पोलिसांनी नोंदवले आहे. धक्कादायक बाब म्हणजे या प्रकरणातील मुख्य आरोपींनी पैज लावत मुलींचे शोषण केले. आतापर्यंत या प्रकरणात अटक आरोपींची संख्या आठवर पोहोचली आहे.

परतवाडा येथील अल्पवयीन मुलींच्या लैंगिक शोषणाचे प्रकरण हे दोन मित्रांच्या विकृतीचा भयंकर परिणाम असल्याचे समोर आले आहे. मुख्य आरोपी अयान अहमद आणि त्याचा मित्र उझैर खान यांच्यात जास्त मुलींना कोण जाळ्यात ओढणार? अशी पैज लागली होती. या विकृत स्पर्धेतूनच अनेक मुलींचे आयुष्य उद्ध्वस्त झाल्याचा धक्कादायक खुलासा झाला आहे.

पैजेतून सुरु झाली विकृती

सूत्रांनी दिलेल्या माहितीनुसार, अयान आणि उझैर यांच्यात तरुणींना मोहात पाडण्याची आणि त्यांच्याशी शारीरिक संबंध ठेवण्याची स्पर्धा लागली होती. अयान मुलींसोबत अश्लील कृत्य करायचा आणि त्याचे व्हिडिओ पुरावा म्हणून उझैरला पाठवायचा. हळूहळू याचे रूपांतर एका भयानक विकृतीत झाले. हे नराधम केवळ व्हिडिओ बनवून थांबले नाहीत, तर त्यांनी ते ऑनलाइन अपलोड करून तरुणींना ब्लॅकमेलही करत होते.

मैत्रीत पडली ठिणगी अन् रॅकेटचा झाला पर्दाफाश

हे प्रकरण इतके दिवस कुणाला माहिती नव्हते होते, मात्र अयान आणि उझैर यांच्यात पैशांवरून वाद झाला. याच वादातून उझैरने अयानला धडा शिकवण्यासाठी त्याचे सर्व अश्लील व्हिडिओ सोशल मीडियावर व्हायरल केले. या दोघांच्या भांडणामुळेच अखेर या संपूर्ण रॅकेटचा पर्दाफाश झाला.

मित्राची रूम घेतली भाड्याने; पोलिसांकडून मित्रालाही बेड्या

मुख्य मास्टरमाईंड अयान अहमद याने पोलिसांसमोर दिलेल्या कबुलीत अनेक धक्कादायक खुलासे केले आहेत. अमरावती शहरात अयानचा एक मित्र काही तासांसाठी आपली भाड्याची खोली अयानला उपलब्ध करून देत होता. याच रूमवर अयान मुलींना घेऊन जायचा आणि त्यांच्यावर अत्याचार करायचा. पोलिसांनी आता या रूम पार्टनर मित्रालाही ताब्यात घेतले असून त्याची कसून चौकशी सुरू आहे.

आरोपींचा आकडा ८ वर; मास्टरमाईंडसह साथीदार गजाआड

परतवाडा पोलिसांनी या प्रकरणात आतापर्यंत अयान अहमद आणि उझैर खानसह एकूण ८ जणांना अटक केली आहे. यामध्ये अयानच्या त्या मित्रांचाही समावेश आहे ज्यांनी जाणीवपूर्वक हे व्हिडिओ पसरवण्यास मदत केली. तांत्रिक पुराव्यांच्या आधारे पोलीस आता प्रत्येक पीडित मुलीपर्यंत पोहोचण्याचा प्रयत्न करत आहेत.