मतमोजणीसाठी प्रशासनाची लगीनघाई

नुकतीच पार पडलेल्या लोकसभा निवडणुकीच्या जिल्हय़ाच्या निकालाकडे सर्वांचे लक्ष लागले आहे. प्रशासनाकडूनही मतमोजणीसाठीची तयारी सुरु असून आवश्यक ..

अमरावती : नुकतीच पार पडलेल्या लोकसभा निवडणुकीच्या जिल्हय़ाच्या निकालाकडे सर्वांचे लक्ष लागले आहे. प्रशासनाकडूनही मतमोजणीसाठीची तयारी सुरु असून आवश्यक मनुष्यबळ व इतर कामाचे नियोजन सुरू असल्याचे निवडणूक विभागाच्या सूत्रांनी सांगितले.
अमरावती लोकसभा मतदारसंघाच्या मतदानापासून तब्बल ३५ दिवसांच्या प्रदीर्घ कालावधीनंतर येत्या १६ मे रोजी लोकसभा निवडणुकीची मतमोजणी बडनेरा मार्गावरील नेमानी गोडाऊन येथे सकाळी आठ वाजतापासून होणार आहे. मागील वेळेपेक्षा यावेळी लोकसभा निवडणुकीत मतदानाची टक्केवारी बर्‍यापैकी वाढली आहे. यावेळी साधारणपणे १0 लाखांहून अधिक मतदारांनी मतदानाचा हक्क बजावला आहे. लोकसभा निवडणुका एकूण १९ उमेदवार रिंगणात होते. लोकसभा निवडणुकीच्या मतमोजणीसाठी जिल्हा निवडणूक विभागाने प्राथमिक यादी तयार केली आहे. लोकसभा निवडणुकीची मतमोजणी पारदर्शकपणे होऊन याला लागणारा वेळ टळावा, यासाठी नियोजनबद्धरित्या प्रशासकीय यंत्रणेकडून नियोजन सुरू आहे. लोकसभा निवडणुकीची मतमोजणी करण्यासाठी जिल्हा निवडणूक विभागाने २0 टेबलवर मतमोजणी करण्याचा प्रस्ताव निवडणूक आयोगाकडे पाठविला आहे.