खाद्य पदार्थांची चढय़ा दराने विक्री केल्यास खैर नाही!

अकोला रेल्वे स्थानकावरील फलाटांवर सर्रासपणे दामदुप्पट किमतीने विकले जात असल्याची बाब ‘लोकमत’ने २१ मे रोजी केलेल्या स्टिंग ऑपरेशनद्वारे उघडकीस आणली होती.

अकोला : एका नामांकित कंपनीच्या इन्स्टिट्युशनल पॅकमधील आईस्क्रीम कप खुल्या स्वरूपात विकण्याची परवानगी नसतानादेखील अकोला रेल्वे स्थानकावरील फलाटांवर सर्रासपणे दामदुप्पट किमतीने विकले जात असल्याची बाब ह्यलोकमतह्णने २१ मे रोजी केलेल्या स्टिंग ऑपरेशनद्वारे उघडकीस आणली होती. या बाबीची दखल घेत, मध्य रेल्वेचे भुसावळ येथील अप्पर मंडळ रेल्वे प्रबंधक प्रदीप बारापात्रे, वरिष्ठ वाणिज्य प्रबंधक एन. जी. बोरीकर आणि इतर वरिष्ठ अधिकार्‍यांच्या चमूने बुधवार, २८ मे रोजी रेल्वे स्थानकावरील खाद्य पदार्थांच्या दुकानांची तपासणी केली. या पाहणीदरम्यान रेल्वे प्लॅटफार्मवर चढय़ा दराने खाद्यपदार्थांची विक्री करणार्‍यांची खैर नसल्याचा इशारा देण्यात आला. उन्हाळा असल्याने अबालवृद्धांचा थंड पदार्थ सेवन करण्याकडे अधिक ओढा असतो. एका नामांकित कंपनीचे आईस्क्रीम खुल्या स्वरूपात विकण्याची परवानगी नसतानादेखील प्रवाशांना दामदुप्पत दराने ते विकण्याचा सपाटा मध्य रेल्वेच्या एक, दोन व तीन नंबरच्या फलाटांवरील काही वेंडर्सनी चालविला होता. याबाबत माहिती मिळताच ह्यलोकमतह्णने स्टिंग ऑपरेशन करून सदर बाब उघडकीस आणली होती. अशा पद्धतीने नामांकित कंपनीचे पदार्थ विकून प्रवाशांना उल्लू बनविणार्‍या खाद्य पदार्थ विक्रेत्यांवर कारवाई करणार आसल्याचे संकेत बुधवारी अकोला रेल्वे स्थानकाची पाहणी करण्यासाठी आलेल्या भुसावळ येथील अप्पर मंडळ रेल्वे प्रबंधक प्रदीप बारापात्रे, वरिष्ठ वाणिज्य प्रबंधक एन. जी. बोरीकर यांनी दिलेत. यामुळे आत्तापर्यंत कुठल्याही कारवाईची तमा न बाळगणार्‍या व्यावसायिकांचे धाबे दणाणले आहे.