आरोपीस चार वर्ष सक्तमजुरीची शिक्षा

अल्पवयीन मुलीच्या विनयभंग प्रकरणी अकोट येथील न्यायालयाचा निर्णय.

आकोट ( जि. अकोला) : तेल्हारा येथील एका महाविद्यालयात प्रवेश मिळाला की नाही, हे पाहण्याकरिता जात असलेल्या अल्पवयीन मुलीचा विनयभंग केल्याच्या आरोपाखाली वाडी अदमपूर येथील आरोपी शरद विठ्ठल बाजोड यास आकोट येथील अतिरिक्त सत्र न्यायालयाने २८ मे रोजी सक्तमजुरीची शिक्षा व दंडाची शिक्षा सुनावली आहे. सरकारी वकील अँड. जयकृष्ण गावंडे यांनी दिलेल्या माहितीनुसार, ८ जुलै १४ रोजी तेल्हारा येथील डॉ. गोपाळराव खेडकर महाविद्यालयात प्रवेश मिळाला किंवा नाही, याकरिता दोन मैत्रिणी जात असताना आरोपी शरद विठ्ठल बाजोड याने अल्पवयीन मुलीचा विनयभंग केला. या घटनेच्यावेळी अतिरिक्त पोलीस अधीक्षक खाटमोडे पाटील तेल्हारा येथे निरीक्षणाकरिता येत असताना ही घटना घडली. सदर आरोपीने आपला विनयभंग केल्याची तक्रार सदर मुलीने अतिरिक्त पोलीस अधीक्षक खाटमोडे यांच्याकडे घटनास्थळीच केली. खाटमोडे यांचे आदेशावरून तपासाची चक्रे त्वरित फिरून तेल्हारा पो. स्टे. येथे आरोपी शरद बाजोडविरुद्ध भादंवि कलम ३५४ (१) व लैंगिक अत्याचार प्रतिबंधक कायदा २0१२ चे कलम ८ व १२ नुसार गुन्हा दाखल करण्यात आला. तपासाअंती पो. स्टे. निरीक्षक अन्वर एम. शेख यांनी सत्र न्यायालयात दोषारोपपत्र दाखल केले. आरोपीविरुद्ध आकोट येथील अतिरिक्त सत्र न्यायाधीश सु. वा. चव्हाण यांच्या न्यायालयामध्ये सुनावणीदरम्यान सरकार पक्षातर्फे अतिरिक्त पोलीस अधीक्षक खाटमोडे यांच्यासह ६ साक्षीदार तपासण्यात आले. आरोपीविरुद्ध सबळ पुरावा असल्यामुळे न्यायालयाने आरोपीला बाल लैंगिक अत्याचार प्रतिबंधक कायदा २0१२ चे कलम ८ अंतर्गत चार वर्ष सक्तमजुरी व १0 हजार रुपये दंड, दंड न भरल्यास ६ महिने सश्रम कारावासाची शिक्षा सुनावली. दंडापैकी ५ हजार रुपये पीडित मुलीच्या वडिलांना नुकसानभरपाई म्हणून देण्याचा आदेश पारित केला. सरकार पक्षातर्फे जयकृष्ण गावंडे यांनी बाजू मांडून युक्तिवाद केला तर पैरवी अधिकारी म्हणून हेकाँ. पालेकर यांनी सहकार्य केले.