उपायुक्त सरसावल्या; आरोग्य अधिका-याला अल्टिमेटम

स्वच्छतेच्या कामात हलगर्जी चालणार नसल्याचा इशारा.

अकोला: ऐन पावसाळ्य़ात शहराच्या कानाकोपर्‍यात घाण व कचर्‍याचे ढीग साचल्यामुळे विविध जीवघेण्या साथरोगांसाठी पोषक वातावरण निर्माण झाले आहे. शहराच्या विविध भागात तुंबलेली गटारे- घाण, कुजलेल्या कचर्‍याची गंभीर स्थिती ह्यलोकमतह्णने उजेडात आणताच प्रशासनाच्या पायाखालची जमीन सरकली. प्रभारी उपायुक्त माधुरी मडावी यांनी शुक्रवारी सकाळी विविध भागातील साफसफाईच्या कामाची पाहणी करीत क्षेत्रीय अधिकारी व साहाय्यक आरोग्य अधिकार्‍याला अल्टिमेटम दिला. पावसाळ्य़ाच्या दिवसात शहरातील मोठे नाले, गटारे घाणीने तुडुंब साचली आहेत. आरोग्य विभाग प्रमुख व स्वच्छता निरीक्षकांच्या पाठबळामुळे आस्थापनेवरील सफाई कर्मचार्‍यांसह खासगी सफाई कर्मचार्‍यांनी स्वच्छतेच्या कामाला ठेंगा दाखवल्याने मुख्य रस्ते, बाजारपेठ, खासगी रुग्णालये, हॉटेल परिसरासह सर्व्हिस लाइनमध्ये घाणीचे ढीग आहेत. यामध्ये खुद्द भाजप-शिवसेनेच्या पदाधिकार्‍यांसह नगरसेवकांच्या प्रभागांचा समावेश आहे. यासंदर्भात लोकमतने विशेष वृत्त प्रकाशित केल्यानंतर प्रशासकीय यंत्रणेला जाग आली. माधुरी मडावी यांनी शुक्रवारी स्वच्छतेच्या कामाची पाहणी केली असता, घाण व कचर्‍याचे ढीग आढळून आले.