अकोला रेल्वे स्थानकाचा लवकरच कायापालट

‘लोकमत’ने अकोला रेल्वे स्थानकाशी निगडित काही विषयांवर मंडळ वाणिज्य प्रबंधक एन. जी. बोरीकर यांच्याशी चर्चा केली. या चर्चेत अकोला रेल्वे स्थानकाचा लवकरच कायापालट होणार असल्याचे संकेत त्यांनी दिलेत.

अकोला : बुधवारी भुसावळ मंडळ अप्पर रेल्वे प्रबंधकांच्या आगमनापूर्वीच भुसावळ मंडळ वाणिज्य प्रबंधक एन. जी. बोरीकर, वरिष्ठ विभागीय अभियंता देवदास दत्ता, मुख्य वैद्यकीय अधिकारी पिंप्रीकर, हिंदी राज्यभाषा अधिकारी शुक्ला, आरपीएफचे वरिष्ठ अधिकारी पी.एल. वर्मा हे अकोला रेल्वे स्थानकावर पोहोचले होते. दरम्यान ह्यलोकमतह्णने अकोला रेल्वे स्थानकाशी निगडित काही विषयांवर मंडळ वाणिज्य प्रबंधक एन. जी. बोरीकर यांच्याशी चर्चा केली. या चर्चेत अकोला रेल्वे स्थानकाचा लवकरच कायापालट होणार असल्याचे संकेत त्यांनी दिलेत. प्रश्न : अकोला रेल्वे स्थानकावर सीसी कॅमेरे केव्हा लागणार? उत्तर : सुरक्षेच्या दृष्टीने अकोला रेल्वे स्थानकावर सीसी कॅमेरे लावण्याची नितांत गरज आहे. सीसी कॅमेरे लावण्याची प्रक्रिया ही केंद्रीय स्तरावर सुरू करण्यात आली आहे. टप्प्याटप्प्याने प्रत्येक राज्यातील रेल्वे स्थानकांवर ते लावले जात आहेत. पहिल्या टप्प्यात राज्याच्या मेट्रो सिटीतील रेल्वे स्थानकांवर कॅमेरे लावण्यात आलेत. दुसर्‍या टप्प्यात अकोला रेल्वे स्थानकाचा क्रमांक लागणार आहे. रेल्वे प्रशासनामार्फत राज्यात दुसर्‍या टप्प्याच्या कामाला लवकरच सुरुवात होईल. प्रश्न : लगेज स्कॅनिंग मशीन धूळ खात पडली आहे. तिचा योग्य वापर कधी सुरू होणार? उत्तर : ज्या वेळी अकोला रेल्वे स्थानकावर लगेज स्कॅनिंग मशीन लावण्यात आली, त्या काळातील नियोजनाचा विचार करूनच ती लावण्यात आली होती. भविष्यात रेल्वे स्थानकाच्या रचनेत काही बदल होणार आहेत. दोन्ही दादर्‍यांच्या पायथ्याशी विशेष खोली निर्माण करण्यात येणार आहे. भविष्यात अकोल्यात एक नव्हे तर दोन लगेज स्कॅनिंग मशीन लावण्यात येणार आहेत. प्रश्न : वाहनतळाचे काय झाले? उत्तर : वाहनतळाचा प्रश्न अद्याप कायम आहे. नाशिकच्या कंत्राटदाराने कंत्राट सोडल्यानंतर वाहनतळाचे नवीन कंत्राट देण्यासाठी भुसावळ मंडळ अधिकार्‍यांनी कंत्राटाची रक्कम १0 टक्कय़ाने कमी केली होती. मात्र अद्याप रेल्वे प्रशासनाला वाहनतळासाठी नवीन कंत्राटदार मिळालेला नाही. येथील वाहनतळाचे कंत्राट घेऊन अर्थार्जन करण्यासाठी नवयुवकांनी समोर यावे, असे मी आवाहन करेन. प्रश्न : खाद्य पदार्थ विक्रेत्यांकडून प्रवाशांची आर्थिक लूट केली जाते. त्यावर निर्बंध कसे लावणार? उत्तर : अधिकार्‍यांची पाठ फिरली की असे प्रकार होणारच; परंतु प्रवाशांनीदेखील जागरुक राहण्याची गरज आहे. एमआरपी, एक्सपायरी, त्यावरील कंटेन्ट पाहिल्याशिवाय प्रवाशांनी कुठलीच वस्तू खरेदी करू नये. या उपरही फसवणूक झाली असल्यास स्थानिक अधिकार्‍यांजवळ असलेल्या तक्रार रजिस्टरमध्ये नागरिकांनी तक्रार नोंदवावी. तक्रार लिखित स्वरूपात असल्यास त्याचा वेगळा प्रभाव पडतो. तक्रार रजिस्टरमध्ये नोंदविण्यात आलेल्या तक्रारीची दखल भुसावळ मंडळ अधिकार्‍यांमार्फत नक्कीच घेतली जाईल. प्रश्न : रेल्वे स्थानकावर बाल कामगारदेखील काम करीत असल्याचे आढळून आले आहे. त्यावर आपण कारवाई कशी करणार? उत्तर : बाल कामगार कायद्यानुसार रेल्वे स्थानकावर बालकांना काम करण्यास परवानगी नाही. वय १२ असो वा १८ ते बालकामगारच. असे दृष्य आढळून आल्यास जागरुक नागरिकांनी ही बाब त्वरित स्थानिक रेल्वे अधिकार्‍यांच्या निदर्शनास आणून द्यावी. त्यावर कारवाई केली जाईल. तक्रार केल्याशिवाय अशा विषयांसंदर्भात कारवाई करणे कठीण आहे. स्थानिक एनजीओ, बाल कल्याण अधिकार्‍यांनी देखील सतर्क रहावे.