रक्कम दुप्पट करण्याच्या बहाण्याने दोघा भोंदूंनी एकास लुटले

श्रीगोंदा : बँकेच्या कर्जाची परतफेड करण्यासाठी तुम्ही रोख पैसे घेऊन या आम्ही ती रक्कम दुप्पट करून देतो, असे आमिष दाखवून करमाळा येथील दोन भोंदूंनी दत्तात्रय महादेव शेटे यांची ४ लाख ५० हजार रुपयांची फसवणूक केली. ही घटना १३ ऑगस्ट रोजी सायंकाळी सात वाजता हिरडगाव फाट्यावरील (ता. श्रीगोंदा) साईकृपा कारखान्याजवळ घडली.

याबाबत दत्तात्रय शेटे यांनी श्रीगोंदा पोलीस ठाण्यात फिर्याद दिली. त्यावरून दोन अज्ञात इसमांविरोधात फसवणुकीचा गुन्हा दाखल झाला.

करमाळा येथील शेटे यांना दोन अज्ञात व्यक्तींनी तुमच्यावर असलेले बँकेचे कर्ज फेडण्यासाठी तुम्ही रोख रक्कम घेऊन या आम्ही ती रक्कम दुप्पट करून देतो, असे सांगितले.

त्यांच्या बोलण्यावर विश्वास ठेवून आमिषाला बळी पडून शेटे हे साडेचार लाख रुपये घेऊन १३ ऑगस्ट रोजी सायंकाळी सातच्या सुमारास हिरडगाव येथील साईकृपा कारखाना परिसरात आले.

त्यानंतर या दोन अज्ञात इसमांनी शेटे यांच्याकडून साडेचार लाख रुपये घेतले. शेटे यांच्या हातात तांदूळ, लिंबू, फुले ठेवून ती रक्कम भगव्या कपड्यामध्ये बांधून कारच्या डिकीमध्ये ठेवली. शेटे यांना कारला प्रदक्षिणा मारण्यास सांगितले. प्रदक्षिणा मारत असतानाच या दोन भोंदूंनी डिकीतील साडेचार लाख रुपये काढून घेतले व पसार झाले. पुढील तपास पोलीस उपनिरीक्षक रणजित गट करत आहेत.