सिद्धटेक : कर्जत तालुक्यातील भांबोरा-दुधोडी रस्ता आठच दिवसात उखडल्याने येथील दोघा दिव्यांगांनी तक्रार करण्यासाठी गुरुवारी थेट नगर गाठले. येथे त्यांनी सार्वजनिक बांधकाम विभागाच्या अधिकाऱ्यांना भेटून रस्त्याच्या दर्जाबाबत माहिती दिली.
शेती, व्यापार या दृष्टीने महत्त्वाचा असणाऱ्या भांबोरा-दुधोडी या रस्त्याचे काम आठ दिवसांपूर्वी झालेले होते. मात्र काम निकृष्ट दर्जाचे झाल्याने ते पूर्णत: उखडले आहे. रस्त्यावर साचलेल्या कचमुळे दुचाकीस्वार पडून अपघात होत आहेत. एक कोटी तीस लाख रुपये अंदाजपत्रकाचे २६५० मीटरचे रस्त्याचे काम गेली दोन वर्षांपासून सुरू आहे. मध्यंतरीच्या विश्रांतीनंतर पुन्हा पावसाळ्यात काम सुरू झाले. मुरूम, चिखलमाती यावरच कमी प्रतीचा डांबराचा थर देत असल्यामुळे ग्रामस्थांनी संबंधित अधिकाऱ्यांकडे तक्रार केली होती. परंतु, याकडे त्यांनी कानाडोळा केला होता.
या अगोदरही निकृष्ट कामामुळे एप्रिलमध्ये ‘लोकमत’ने या विषयी आवाज उठविला होता. त्यावेळी भांबोरा ग्रामस्थांनी काम बंद केले होते. मोठ्या अंदाजपत्रकाच्या कामाचा एक साधा फलकही कुठे दिसत नाही. प्रत्येक वेळी वेगळा ठेकेदार दिसत आहे. त्यामुळे नेमक्या कोणत्या एजन्सीने काम घेतले आहे. काम कसे आहे हे समजायला तयार नाही. याचे अंदाजपत्रक ग्रामपंचायतीला मिळेना.
राजेंद्र रणदिवे व नितीन वायकर यांनी या रस्त्याचे काम दर्जेदार होण्यासाठी ग्रामपंचायत, ठेकेदार, सा. बां. विभाग यांच्याशी वेळोवेळी पाठपुरावा केला. परंतु, काम निकृष्ट झाल्याने त्यांनी त्यांच्या तीनचाकी वाहनावरून शंभर किमीचा प्रवास करत थेट नगर गाठत कार्यकारी अभियंता संजय पवार यांचे कार्यालय गाठले व निवेदन दिले.
----
स्थानिक प्रशासन हतबल
नगरच्या एका एजन्सीने या रस्त्याच्या कामाचा ठेका घेतला आहे. त्याने पोट ठेकेदार नेमला आहे. प्रशासनाने बऱ्याच वेळा संपर्क केल्यानंतर काम सुरू झाले. ठेकेदार काम करण्यास टाळाटाळ करत आहे. प्रशासन त्याच्यापुढे हतबल दिसत आहे.
रस्त्यावर चिखल, माती, मुरूम त्यामध्ये कमी प्रतीचे डांबर टाकले. रस्ता आठ दिवस टिकला नाही याची उच्चस्तरीय चौकशी व्हावी. तोपर्यंत संबंधित ठेकेदाराचे बिल अदा करण्यात येऊ नये.
-राजेंद्र रणदिवे, नितीन वायकर, मिनीनाथ रणदिवे
ग्रामस्थ, भांबोरा
------
भांबोरा-दुधोडी रस्ता कामाबाबत उप अभियंता व कनिष्ठ अभियंता यांना योग्य त्या सूचना दिल्या आहेत.
-संजय पवार,
कार्यकारी अभियंता सा. बां. नगर
---------
२३ भांबोरा रोड
भांबोरा-दुधोडी रस्त्यावर साचलेली कच