मराठा, ओबीसी समाजातील विद्यार्थ्यांचे शैक्षणिक शुल्क माफ करावे

संगमनेर : मराठा आणि ओबीसी समाजातील विद्यार्थ्यांचे शैक्षणिक शुल्क माफ करावे, अशी मागणी भारतीय जनता पक्षाच्या युवा मोर्चाच्या वतीने करण्यात आली. गुरुवारी (दि. २४) संगमनेर तालुक्यातील भारतीय जनता पक्ष आणि काँग्रेस पदाधिकाऱ्यांच्या शैक्षणिक संस्थांमध्ये जात युवा मोर्चाचे पदाधिकारी आणि कार्यकर्त्यांनी मागणीसंदर्भाने निवेदन दिले.

युवा मोर्चाचे तालुकाध्यक्ष शैलेश फटांगरे, शहराध्यक्ष दीपेश ताटकर, सरचिटणीस संतोष गायकवाड, संघटन सरचिटणीस शशांक नामन, कोषाध्यक्ष स्वप्निल लोंढे, शहर सरचिटणीस संतोष गायकवाड, उपाध्यक्ष पोपट घुले, प्रकाश दिघे, हरीश वलवे, संतोष हांडे, ऋषी कांडेकर, गोरक्ष घुगे, योगेश डुबे, सागर कानवडे, अरविंद वाकचौरे, सागर ढेरे, संतोष कोथमिरे, संतोष पठाडे, अक्षय अमृतवाड, विकास जाधव, किरण गुंजाळ, रोहित चौधरी, अरुण थिटमे आदी यावेळी उपस्थित होते.

मराठा, ओबीसी समाजाच्या आरक्षणाबाबत निर्माण झालेल्या परिस्थितीनंतर या दोन्ही समाजांत अस्वस्थता आहे. दोन्ही समाजांना आरक्षण देण्याला महाविकास आघाडी सरकारची उदासीनता समोर आली आहे. त्यामुळे या समाजातील विद्यार्थ्यांसमोर निर्माण झालेल्या प्रश्नांच्या पार्श्वभूमीवर विद्यार्थ्यांचे शैक्षणिक शुल्क माफ करण्याचा तसेच काही सवलती देण्याचा निर्णय राज्य सरकारने करायला हवा होता, परंतु सरकारने कोणताच निर्णय न केल्याने ग्रामीण आणि शहरी भागातील विद्यार्थी, पालकांसमोर मोठ्या अडचणी निर्माण झाल्या आहेत. एकीकडे आरक्षणाचे प्रश्न आणि दुसरीकडे कोरोना संकटामुळे समाजघटकांसमोर निर्माण झालेल्या आर्थिक प्रश्नांमुळे अनेक विद्यार्थी शैक्षणिक प्रवाहातून बाजूला जाण्याची भीती आहे.

अशा सर्व परिस्थितीत प्रवरा ग्रामीण शिक्षण संस्थेने पन्नास टक्के शैक्षणिक शुल्क माफ करण्याचा निर्णय करून विद्यार्थी, पालकांना दिलासा दिला. त्याचप्रमाणे राज्य सरकारनेसुद्धा इतर संस्थांना पन्नास टक्के शैक्षणिक शुल्क माफ करण्याचे निर्देश द्यावेत, असे दिलेल्या निवेदनात म्हटले आहे.