एसटीची सुरक्षा वाऱ्यावर

लोकमत न्यूज नेटवर्क

अहमदनगर : सामान्यांसाठीहीची लालपरी अर्थात एसटी बसमध्ये अग्निशमन यंत्रणा नसल्याने, तसेच प्रथमोपचार पेट्याच गायब असल्याने एसटीची सुरक्षा चव्हाट्यावर आली आहे. ‘लोकमत’ने तारकपूर बसस्थानकात जाऊन याबाबत ‘रियालिटी चेक’ केली असता ही गंभीर बाब समोर आली.

गेल्या काही दिवसांमध्ये एसटी बसमध्ये आग लागल्याच्या किंवा किंवा कोणीतरी त्या लावल्याच्या काही घटना घडल्या आहेत. त्यात प्रवाशांना इजाही झालेली आहे. अशा स्थितीत सामान्यांसाठी असलेली एसटी बस सुरक्षित असावी यासाठी एसटी महामंडळाने प्रत्येक बसमध्ये अग्निशमन यंत्रणा म्हणजे आग विझविण्यासाठीचा बंब ठेवण्याच्या सूचना दिल्या आहेत. ही यंत्रणा खरंच बसमध्ये आहे का, याबाबत लोकमत प्रतिनिधीने नगर शहरातील तारकपूर बसस्थानकात जाऊन पाहणी केली असता अनेक बसमध्ये हे बंब नसल्याचे आढळले. याबाबत चालक-वाहकांकडे विचारणा केली असता अनेकांना ही यंत्रणा बसमध्ये आहे की नाही, हेच सांगता आले नाही.

-------------

प्रथमोपचार पेट्याच गायब

काही कारणास्तव प्रवासी जखमी झाले तर त्यांच्यावर प्रथमोपचार करण्यासाठी प्रथमोपचार पेटी प्रत्येक बसमध्ये असणे बंधनकारक आहे. परंतु अनेक बसमध्ये या पेट्याच नव्हत्या. काहींमध्ये पेट्या होत्या, परंतु त्यात उपचाराचे साहित्यच नव्हते.

----------

या बसेसमध्ये अग्निशमन यंत्रणाच नाही

पंढरपूर-नाशिक (एमएच १४ बीटी ४२८७)

शिंदखेडा-पुणे (एमएच २० बीएल २६६२)

पुणे-मनमाड (एमएच १४ बीटी ०७००१)

नगर-श्रीरामपूर (एमएच ०७ सी ९१३८)

-----------

वायफाय सुविधा बंद

काही दिवसांपूर्वी प्रवाशांसाठी बसमध्ये वायफाय सुुविधा देण्यात आलेली होती. परंतु सोमवारी पाहणी केलेल्या एकाही बसमध्ये ही सुविधा नव्हती. मागेच ही सुविधा बंद करण्यात आली, असे चालक-वाहकांनी सांगितले.

----------

आयो-जावो घर तुम्हारा

स्थानकात जाताना लोकमत प्रतिनिधीकडे कोणीही सुरक्षारक्षकाने विचारणा केली नाही. त्यामुळे स्थानकात उभ्या असलेल्या बस किंवा तेथील परिसर सुरक्षित आहे का, असाही प्रश्न उभा राहतो. स्थानकात दुचाकी, चारचाकीसह कोणीही सहज प्रवेश करू शकत होता.

----------

प्रवाशांची सुरक्षा रामभरोसे

बसमध्ये प्रवासी चढताना त्यांनी मास्क लावले आहे की नाही, याबाबत वाहक हटकताना दिसले नाहीत. त्यामुळे अनेक प्रवासी मास्क न लावताच बसमध्ये चढ-उतार करत होते. काही बसमध्ये तर क्षमतेपेक्षा जास्त प्रवासी उभे राहून प्रवास करताना आढळले.

--------------

फोटो- २२ एसटी