महसूलच्या कारवाईचा मनपाच्या कामांना फटका

अहमदनगर : महापालिकेच्या कामांसाठी लागणाऱ्या दगड, खडी आणि मुरमाची वाहतूक करणाऱ्या वाहनांवर महसूल विभागाकडून कारवाई करण्यात येत आहे. महसूलच्या या कारवाईचा फटका शहरातील रस्त्यांच्या कामांना बसत आहे. परिणामी अर्धवट अवस्थेत असलेल्या रस्त्यांमुळे नागरिकांना खड्ड्यांतून प्रवास करावा लागत आहे.

महापालिका हद्दीत रस्त्यांची मोठ्या प्रमाणात कामे सुरू आहेत. या कामांसाठी दगड, खडी आणि मुरमाची आवश्यकता असते. रस्ते व गटारींची कामे घेतलेले ठेकेदार खडी, मुरूम, दगड वाहतूकदारांकडून विकत घेतात. त्याबदल्यात महापालिका कामाच्या अंदाजपत्रकात नमूद असलेल्या खडी, दगड आणि मुरमावर महसूल विभागाला रॉयल्टी भरते. दरवर्षी रॉयल्टीचा धनादेश महापालिका महसूलला जमा करत असते. असे असले तरी मनपाच्या ठेकेदारांनी मागविलेल्या दगड, खडी, मुरमाच्या वाहनांवर महसूल विभागाकडून कारवाई केली जाते. कामाचा कार्यारंभ आदेश दाखविला तरी वाहन सोडले जात नाहीत. वाहन मालकावर दंडात्मक कारवाई केली जाते. ही कारवाई लाखांच्या घरात असते. त्यामुळे वाहतूकदार चढ्या भावाने गौण खनिज विक्री करत असून, ते दर ठेकेदारांना परवडत नाहीत. वाढीव दराने खरेदी करण्यापेक्षा ठेकेदार कामे बंद ठेवून तसे पत्र महापालिकेला देत आहेत. त्यामुळे नाईलाजाने महापालिकेला कामे थांबवावे लागत असून, ऐन पावसाळ्यात ही कामे थांबल्याने नागरिकांना त्रास सहन करावा लागत आहे.

...........

दोन ब्रासचा नियम ठरतोय डोकेदुखी

खाणीतून दगड, मुरूम आणि खडी वाहतूक करताना सिंगल एक्सल वाहनांसाठी २ ब्रास, तर मल्टीएक्सल वाहनांसाठी ४ ब्रास असा नियम आहे. परंतु, डिझेलचे दर वाढल्यामुळे २ ब्रासची वाहतूक करणे वाहतूकदारांना परवडत नाही. त्यामुळे ते जास्तीची वाहतूक करत असून, अशा वाहनांवर महसूलकडून कारवाई केली जात आहे.

.....

शासकीय कामांसाठी लागणाऱ्या गौण खनिजाची वाहतूक नियमानुसार केल्यास कारवाई केली जात नाही. जे वाहतूकदार नियमानुसार वाहतूक करणार नाही, अशा वाहनांवर कारवाई केली जात असून, ठेकेदारांनी नियमानुसार वाहतूक करावी.

- उमेश पाटील, तहसीलदार, नगर तालुका

....

महापालिका एकरकमी रॉयल्टी महसूल विभागाला भरते. असे असून रस्त्यासाठी गौण खनिजांची वाहतूक करणाऱ्या वाहनांवर महसूलकडून कारवाई केली जात आहे. त्यामुळे दगड, खडी आणि मुरमाअभावी शहरातील रस्त्यांची कामे थांबली आहेत.

- सुरेश इथापे, शहर अभियंता, महापालिका

....

शहरातील रस्त्यांची कामे घेतलेले ठेकेदार खडी, मुरूम आणि दगड वाहतूकदारांकडून विकत घेतात. त्यांची वाहने महसूलचे कर्मचारी पकडतात. त्यामुळे वाहतूकदारांकडून साहित्याचा पुरवठा होत नाही. परिणामी चढ्या भावाने साहित्य खरेदी करावे लागत असून, कार्यारंभ आदेश दाखविल्यानंतर वाहने सोडून द्यावीत. जेणेकरून रस्त्यांची कामे थांबणार नाहीत.

- आनंद पुंड, अध्यक्ष, महापालिका ठेकेदार संघटना