अहमदनगर : महाराष्ट्र राज्य इतर मागासवर्गीय वित्त आणि विकास महामंडळ (ओबीसी महामंडळ) यांच्यातर्फे इतर मागासवर्गीयांना व्यवसाय व लघुउद्योगासाठी कर्ज देण्यात येणार आहे. त्यासाठी इच्छुकांनी अर्ज करण्याचे आवाहन महामंडळाच्या नगर येथील कार्यालयाने केले आहे.
महामंडळातर्फे २०२१-२२ या आर्थिक वर्षासाठी उद्दिष्ट प्राप्त झाले असून, व्याज परतावा कर्ज योजना १० लाखांपर्यंत १०० प्रकरणे, बीज भांडवल कर्ज ६३ प्रकरणे, बचत गटासाठी गटकर्ज व्याज परतावा योजना (१० ते ५० लाख) १२ प्रकरणे एवढे उद्दिष्ट आहे. त्यासाठी लाभार्थ्याने शासनाच्या अधिकृत संकेतस्थळावर अर्ज करणे आवश्यक आहे. महामंडळाकडून एक लाखाच्या थेट बिनव्याजी कर्ज योजनेंतर्गत १२१ ओबीसी प्रवर्गातील बेरोजगार तरुणांना लघुउद्योगांसाठी कर्ज योजनेचा लाभ घेता येणार आहे. यासाठी अर्जदाराचा बँक व्यवहाराशी संबंधित असलेला सिव्हिल क्रेड़िट स्कोअर पाचशे असणे आवश्यक आहे. इच्छुक लाभार्थ्यांनी अधिक माहितीसाठी महामंडळाच्या साई सेना अपार्टमेंटसमोर, सिद्धेश्वर बेकर्सजवळ, सारसनगर येथे संपर्क साधण्याचे आवाहन जिल्हा व्यवस्थापक दिनेश चव्हाण यांनी केले आहे.