अहमदनगर : रात्रीच्या वेळी प्रवाशांना कारमध्ये बसवून निर्जन ठिकाणी नेत लूटमार करणारी चौघांची टोळी कोतवाली पोलिसांनी शुक्रवारी कल्याण रोड परिसरातून जेरबंद केली. आरोपींमध्ये एका अल्पवयीन मुलाचा समावेश आहे.
शुभम भागाजी बुगे (रा. बुगेवाडी, ता. पारनेर), विनोद सुधाकर पाटोळे (रा. बहीरवाडी, ता. नगर) आकाश संतोष नायकोडी (रा. जामगाव, ता. पारनेर) व एक अल्पवयीन मुलगा असे अटक केलेल्या आरोपींची नावे आहेत. या आरोपींनी ३ एप्रिल रोजी रात्री शहरातील माळीवाडा बसस्थानक परिसरातून नाशिक येथील प्रवासाला कारमध्ये बसवून निर्जन ठिकाणी नेत त्याला मारहाण करत त्याच्याकडील पैसे लुटून नेले. त्यानंतर याच टोळीने पुन्हा ४ एप्रिल रोजी आष्टी येथील एका प्रवाशाला कारमध्ये बसवून त्याची लूटमार केली होती. दरम्यान, या टोळीने नगर तालुका, एमआयडीसी पोलीस ठाणे हद्दीतील अशीच लूटमार केली असल्याचे पोलीस तपासात समोर आले आहे.
जिल्हा पोलीस अधीक्षक मनोज पाटील, अपर पोलीस अधीक्षक सौरभ अग्रवाल, पोलीस उपअधीक्षक अजित पाटील, यांच्या मार्गदर्शनाखाली कोतवाली पोलीस ठाण्याचे निरीक्षक राकेश माणगावकर, सहायक पोलीस निरीक्षक विवेक पवार, पोलीस नाईक गणेश धोत्रे, विष्णू भागवत, नितीन शिंदे, शाहिद शेख, योगेश भिंगारदिवे, सुमित गवळी, तानाजी पवार, सुजय हिवाळे, प्रमोद लहारे, सोमनाथ राऊत आदींच्या पथकाने ही कारवाई केली.