विविध कार्यकारी सोसायटींच्या निवडणुकीवर कोरोनाचे सावट

अहमदनगर : जिल्ह्यातील ४९ विविध कार्यकारी सोसायटींच्या निवडणुकीची प्रक्रिया सोमवारी सुरू करण्यात आली आहे. दरम्यान, कोरोनाचा प्रादुर्भाव वाढत असल्याने गर्दी रोखण्यासाठी प्रशासकीय यंत्रणा सतर्क झाली आहे. सोसायटींच्या निवडणुकीमुळे गर्दी होणार असल्याने या निवडणुकीवर कोरोनाचे सावट असल्याचे सांगितले जाते.

कोरोनाच्या पार्श्वभूमिवर गत मार्च महिन्यांत लॉकडाऊन करण्यात आला. त्यामुळे सहकारी संस्थांच्या निवडणुका स्थगित केल्या गेल्या. लॉकडाऊन शिथिल झाल्याने निवडणुकांची स्थगिती सहकार खात्याकडून उठविण्यात आली. जिल्ह्यातील ४९ विविध कार्यकारी सोसायटींच्या निवडणूक प्रक्रिया मतदार यादी अंतिम करण्याच्या टप्प्यावर थांबविण्यात आली होती. शासनाने स्थगिती उठविल्याने येथील उपजिल्हा निबंधक कार्यालयाकडून निवडणुकीचा कार्यक्रम जाहीर करण्यात आला आहे. त्यानुसार सोमवार उमेदवारी दाखल करण्यासह सुरुवात झाली आहे. जिल्ह्यातीन नगर, नेवासा, शेवगाव, श्रीगोंदा, पाथर्डी, संगमनेर, राहाता, राहुरी, जामखेड, पारनेर तालुक्यातील विविध कार्यकारी सोसायटींच्या निवडणुका होत असून, त्यासाठी मार्च अखेरीस मतदान घेण्यात येणार आहे. याशिवाय सहकारी साखर कारखान्यांच्या निवडणुकीची प्रक्रिया सुरू करण्यात आली आहे. मतदारांच्या याद्या जाहीर करण्यात येत असून, या निवडणुकांवरही कोरोनाचे सावट आहे.

....

सोसायटींच्या निवडणुका

नगर- ३, संगमनेर-८, राहाता-५, राहुरी-३, नेवासा-३, शेवगाव-७, श्रीगोंदा-१४ ,पारनेर-५