भंडारदरा धरण ८० टक्के भरले

भंडारदरा, मुळा धरणाच्या पाणलोट क्षेत्रात मागील पंधरा दिवसांपासून पाऊस पुन्हा एकदा सक्रिय झाला. परिसरात पडत असलेल्या धो-धो पावसामुळे ओढे-नाले भरून वाहत आहेत. डोंगरदऱ्यातून फेसाळत कोसळणारे धबधबे पर्यटकांना मोहून घेत असतानाच धरणाच्या पाणीपातळीत झपाट्याने वाढ होत असल्याने ही पातळी स्थिर ठेवण्यासाठी भंडारदरा जलाशयातून सोडण्यात आलेल्या पाण्यामुळे सुरू झालेल्या आंब्रेला फॉलने त्यात भर घातली आहे. पावसामुळे सर्व परिसर जलमय झालेला असतानाच जोरदार वारेही वाहत असल्याने हवेत आता चांगलाच गारठा निर्माण झाला आहे. भंडारदरा धरणाच्या पाणलोट क्षेत्रातील सर्वच ठिकाणी बुधवारी रात्री पावसाच्या जोरदार सरी बरसल्या. घाटघर येथे सात इंचाहून अधिक म्हणजे १८० मिली पाऊस पडला. त्या खालोखाल रतनवाडी येथेही १७० मिलिमीटर पावसाची नोंद झाली. भंडारदरा धरणस्थळी साडेसहा इंच पाऊस पडला. या पावसामुळे धरणात होणाऱ्या नवीन पाण्याची आवक वाढली आणि धरणातील पाणीसाठा सायंकाळी सहा वाजता ८ हजार ८५१ दशलक्ष घनफूट इतका झाला.

भंडारदरा धरणातून वीजनिर्मितीसाठी ८३५ क्युसेक्सने पाणी सोडण्यात येत होते. आता २०० मीटरच्या व्हॉल्व्हमधून ४१९ क्युसेक्सने पाणी सोडण्यास सुरुवात झाली आहे. वाकी परिसरातही १५९ मिलिमीटर पावसाची नोंद झाली. यामुळे येथील लघु पाटबंधारे तलावावरून कृष्णावंती नदीच्या पात्रात पाणी पडत आहे. निळवंडे धरणातील पाणीपातळीत वाढ होत असून सायंकाळी सहा वाजता या धरणातील पाणीसाठा ४० टक्के झाला होता.

...............

भंडारदरा धरण पाणीसाठ्यात वाढ होत असल्याने जलाशय परिचलन सूचीनुसार पाणीपातळी नियंत्रित ठेवण्यासाठी धरणाच्या २०० व्हॉल्व्हमधून ४१३ क्युसेक्सने विसर्ग सोडण्यात आलेला आहे. पर्यटकांचे विशेष आकर्षण असलेल्या आंब्रेला फॉलचा पर्यटकांनी सर्व नियम पाळून आनंद घ्यावा. पर्यटकांनी धिंगाणा घालू नये अन्यथा संबंधितांवर कायदेशीर कारवाई करण्यात येईल.

- अभिजित देशमुख, सहायक अभियंता, जलसंपदा विभाग भंडारदरा