गावातील व्यापारी राजेश हरिनारायण खटोड यांच्या बाजारपेठेतील घराच्या आवारात एका हंड्यामध्ये ही चांदी मिळून आली. तहसीलदार प्रशांत पाटील यांच्या उपस्थितीत हा पंचनामा करण्यात आला. सर्व नाणी मोजून ती आता कोषागारात ठेवण्यात आली आहेत.
व्यापारी खटोड यांनी जिल्हाधिकारी यांच्याकडे गुप्तधन सापडल्याची माहिती दिली होती. आपल्याला काही प्रमाणात गुप्तधन सापडले आहे. त्याचा पंचनामा करावा अशी मागणी खटोड यांनी आपल्या अर्जात केली होती. त्यानुसार मंगळवारी तहसीलदार प्रशांत पाटील यांना पंचनामा करण्याचे आदेश दिले होते. बुधवारी व्हिडिओ चित्रीकरण करून गुप्तधनाचा पंचनामा करण्यात आला. गुप्तधनाचा पंचनामा पाहण्यासाठी मोठी गर्दी जमली होती.
दरम्यान, ही चांदीची नाणी आता कोषागारात ठेवली जाणार असून तहसीलदारांचे त्यावर लक्ष राहील. सापडलेल्या गुप्तधनाचा साठा तपासून पाहण्याचा जिल्हाधिकारी यांना अधिकार आहे. हे गुप्तधन खटोड यांच्या खासगी जागेत मिळून आले आहे. त्यामुळे हे संपूर्ण धन त्यांनाच मिळणार का सरकार जमा होणार हे अद्याप स्पष्ट झालेले नाही. पुरातत्व खात्याकडून या ठिकाणी आणखी काही खोदकाम केले जाणार का? याकडे आता लक्ष लागले आहे.
---