राहुल ठाकरे यांची लाडखेड सर्कलमध्ये दमछाक

विधानसभा मतदारसंघाचे विभाजन होण्यापूर्वी यवतमाळ विधानसभेतील लाडखेड, वडगाव गाढवे व बोरीअरब सर्कल दारव्हा विधानसभा मतदारसंघात काँग्रेस प्रदेशाध्यक्ष माणिकराव ठाकरे यांचा हा

यवतमाळ : विधानसभा मतदारसंघाचे विभाजन होण्यापूर्वी यवतमाळ विधानसभेतील लाडखेड, वडगाव गाढवे व बोरीअरब सर्कल दारव्हा विधानसभा मतदारसंघात काँग्रेस प्रदेशाध्यक्ष माणिकराव ठाकरे यांचा हा परंपरागत मतदारसंघ राहिला आहे. आता याच मतदारसंघाचा भाग यवतमाळ विधानसभेशी जोडला आहे. येथून राहुल ठाकरे काँग्रेसचे उमेदवार असून त्यांना सर्वाधिक आव्हान वडिलाच्या पूर्वाश्रमीच्या मतदारसंघात मिळत आहे. येथे फिरण्यासाठी स्थानिक कार्यकर्ते नसल्याने दारव्ह्यातून कुमक बोलवावी लागत आहे. लाडखेड, वडगाव गाढवे या सर्कलमध्ये सातत्याने काँग्रेसचे वर्चस्व राहिले आहे. मात्र आता परिस्थिती बदलली असून या मतदारसंघात राष्ट्रवादी आणि शिवसेनेने जोरदार फिल्डींग लावली आहे. पूर्वाश्रमीच्या मतदारसंघातच काँग्रेस उमेदवाराची दमछाक होताना दिसत आहे. हा मतदारसंघ काँग्रेसच्या ताब्यातून गेल्याचे जिल्हा परिषदेच्या निवडणुकीतच सिद्ध झाले आहे. या सर्कलमध्ये काँग्रेसच्या दारव्हा तालुका अध्यक्षाला तिसऱ्या क्रमांकावर राहावे लागले होते. जिल्हा परिषदेत राष्ट्रवादी काँग्रेस आणि अपक्ष उमेदवारात लढत झाली होती. आजही हेच समीकरण या सर्कलमध्ये कायम आहे. ज्या सर्कलच्या भरोशावर राहुल ठाकरे यांनी यवतमाळ विधानसभेवर दावा केला तेथेच त्यांना फिरण्यासाठी कार्यकर्ते मिळताना दिसत नाही. सर्कलमधील काँग्रेस गटातटात विखुरली आहे. अंतर्गत वादांमुळे काँग्रेसला अजूनही येथे सूर गवसलेला नाही. जुन्या कार्यकर्त्यांना या पूर्वी आलेला अनुभव लक्षात घेता आता अनेकांनी सावध पवित्रा घेतला आहे. या सर्कलमध्ये बोरीअरब, लाडखेड, वडगाव, देऊरवाडी लाड, पांढुर्णा या मोठ्या गावांचा समावेश आहे. येथेही काँग्रेससाठी पोषक वातावरण दिसत नाही. अनेक गावात तर काँग्रेसच्या उमेदवारासोबत फिरण्यासाठीही कोणी पुढे यायला तयार नाही. ज्या जिल्हा परिषद सर्कलच्या भरोशावर राहुल ठाकरे यांनी यवतमाळ विधानसभेच्या आखाड्यात उडी घेतली तेथेच त्यांना प्रचंड शक्ती खर्च करावी लागत आहे.