विधानसभेपूर्वी जिल्हा परिषदेत रंगीत तालीम

आगामी विधानसभा निवडणूक तोंडावर असली तरी त्याची रंगीत तालीम जिल्हा परिषदेमध्ये अध्यक्ष पदाच्या निवडणुकीत पहायला मिळणार आहे. काँग्रेस आणि राष्ट्रवादीसाठी ही तालीम पुढची

यवतमाळ : आगामी विधानसभा निवडणूक तोंडावर असली तरी त्याची रंगीत तालीम जिल्हा परिषदेमध्ये अध्यक्ष पदाच्या निवडणुकीत पहायला मिळणार आहे. काँग्रेस आणि राष्ट्रवादीसाठी ही तालीम पुढची दिशा ठरविणारी राहणार आहे. जिल्हा परिषदेमध्ये सध्या राष्ट्रवादी काँग्रेस व शिवसेना-भाजपा युतीची सत्ता आहे. आता २१ सप्टेंबरला जिल्हा परिषदेचा नवा अध्यक्ष निवडला जाणार आहे. अनुसूचित जमातीच्या महिलेसाठी हे अध्यक्षपद राखीव आहे. समोर विधानसभा निवडणुकांना सामोरे जावे लागणार असल्याने काँग्रेस-राष्ट्रवादीला अध्यक्षपदाची निवडणूकही समन्वयाने घ्यावी लागणार आहे. जिल्हा परिषदेच्या निवडणुकीत राष्ट्रवादीची भूमिका ताठर राहण्याची चिन्हे आहेत. कारण विधानसभा निवडणुकीत काँग्रेसला सर्वच मतदारसंघात राष्ट्रवादीची मदत लागणार आहे. त्यामुळे जिल्हा परिषद अध्यक्ष पदाच्या निवडणुकीत राष्ट्रवादी म्हणेल तसे ऐकण्याची वेळ काँग्रेसवर येऊ शकते. जिल्हा परिषदेमध्ये काँग्रेसचे २२ तर राष्ट्रवादीचे २१ सदस्य आहेत. शिवसेनेचे दोन बंडखोर सदस्य काँग्रेसच्या तंबूत असले तरी ते त्यांच्या बाजूने मतदान करू शकणार नाही. त्यांची तशी तयारी असल्यास त्यांना सदस्य पदावर पाणी सोडण्याचीही तयारी ठेवावी लागणार आहे. जिल्ह्यातील विधानसभेच्या सात पैकी केवळ पुसद मतदारसंघ राष्ट्रवादीच्या ताब्यात आहे. आता राष्ट्रवादीने आणखी दोन मतदारसंघ वाढवून मागितले आहे. यवतमाळात तर प्रचाराचा नारळही फुटला आहे. विधानसभेच्या सहा जागांवरील आपले आमदार निवडून आणण्यासाठी काँग्रेसला राष्ट्रवादीची साथ हवी आहे. हेच गणित डोळ्यापुढे ठेऊन राष्ट्रवादी यावेळीही जिल्हा परिषद अध्यक्ष पदावर दावा करू शकते. एसटी महिला संवर्गातील दोन सदस्य राष्ट्रवादीकडे आहेत. त्यातील एक महिला सदस्य ज्या नेत्याच्या समर्थनार्थ असल्याचे सांगते तो नेताच आता भाजपात गेला आहे. त्यामुळे राष्ट्रवादीतील दुसऱ्या महिला सदस्याचा अध्यक्षपदाचा दावा सुकर झाला. मुलाचे राजकीय भवितव्य, त्यासाठी हवी असलेली आदिवासी-आंध समाजाची साथ लक्षात घेता भाऊ लालदिवा पुसदमध्ये घेऊन जातील, असे मानले जाते. काँग्रेस उपाध्यक्षपदावर दावा सांगेल. हे पद आपल्या मतदारसंघात यावे म्हणून पालकमंत्र्यांचा प्रयत्न राहू शकतो. पारव्यासारखे मध्यवर्ती केंद्र निवडून त्याचा वणी, केळापूर-आर्णी, राळेगाव, यवतमाळ या चारही मतदारसंघात काँग्रेसला फायदा व्हावा असा प्रयत्न होईल. जिल्हा परिषदेतील सभापती पद देतानाही समतोल राखला जाणार आहे. महिला बालकल्याण सभापतीच्या पदासाठी ‘डिलिंग’ची चर्चा आहे. विधानसभेचे गणित पाहता काँग्रेसकडून जिल्हा परिषद अध्यक्ष पदासाठी हट्ट होण्याची शक्यता कमी आहे. विधानसभेच्या स्पर्धेतील नावे अध्यक्ष अथवा सभापतीच्या स्पर्धेतून बाद होईल. जिल्हा परिषदेत दुसऱ्यांदा राष्ट्रवादीची सत्ता येण्याची चिन्हे दिसू लागली आहेत. (जिल्हा प्रतिनिधी)