हतबल संतोषला मदतीचा हात

येथील फूटवेअरचा व्यवसाय करणार्‍या संतोष जयस्वाल यांचे दुकान नुकतेच आगीत जळून भस्मसात झाले.

आर्णी : येथील फूटवेअरचा व्यवसाय करणार्‍या संतोष जयस्वाल यांचे दुकान नुकतेच आगीत जळून भस्मसात झाले. यामुळे त्याच्यासमोर उपजीविका कशी करावी, असा प्रश्न निर्माण झाला होता. या संदर्भात संतोषच्या पाठीशी समाजाने उभे राहावे, असे आवाहन २0 मेच्या अंकातून लोकमतने केले होते. लोकमतने केलेल्या आवाहनाला आर्णीकरांनी प्रतिसाद देत संतोषला व्यवसाय उभारण्यासाठी २५ हजार रुपयांची मदत दिली.

संतोष जयस्वाल यांचे आर्णी येथे फूटवेअरचे दुकान होते. मुलांचे शिक्षण, कुटुंब व आईचे आजारपण करीत संतोष आपला व्यवसाय सांभाळत होता. जेमतेम आर्थिक परिस्थिती असलेल्या संतोषचे दुकान आगीच्या भक्ष्यस्थानी सापडल्यामुळे तो पुरता हादरला होता. अशातच लोकमतने त्याच्या पाठीशी उभे राहण्यासाठी समाजातील संवेदनांना हाक दिली. या बातमीची दखल घेत शहरातील सामाजिक कार्यकर्ते व लहान-मोठय़ा व्यावसायिकांनी पुढाकार घेत एकाच दिवशी २५ हजार रुपयांचा निधी गोळा केला. हा निधी संतोषच्या घरी जावून त्याला सुपूर्द केला. तेव्हा मात्र संतोष अगदी भारावून गेला होता. त्याच्या डोळ्यातील आसवांना आर्णीकरांच्या संवेदनशीलतेचे उपकार कसे मानावे, हेच सुचत नव्हते.

या प्रसंगी उपस्थितांनी संतोषला धीर दिला. माझे सर्वस्व आगीने गिळंकृत केल्यामुळे माझ्या मनात आत्महत्येचे विचार येवू लागले होते. मात्र तुम्ही दिलेल्या आर्थिक सहकार्यामुळे मी पुन्हा नव्याने माझा व्यवसाय उभा करू शकेन, असे सांगत असताना संतोष पुन्हा रडू लागला. या निमित्ताने संकटात सापडलेल्या एका व्यावसायिकाला सामाजिक कार्यकर्त्यांच्या उत्तरदायित्वामुळे जगण्याचे नवे बळ मिळाले आहे. या मदतीसाठी आर्णीतील व्यावसायिक व सामाजिक क्षेत्रातील अरविंद देशकरी, विठ्ठल देशमुख, राजेंद्र शिवरामवार, सुनील जयस्वाल, नीलेश गावंडे, प्रशांत निलावार, विजय जयस्वाल, यासिम इसानी, विश्‍वास सवने, उद्धव भालेराव, प्रींटींग प्रेस असोसिएशनचे सदस्य, बार असोसिएशनचे अध्यक्ष, सराफा लाईनचे सदस्य आदी मंडळींनी पुढाकार घेतला. (शहर प्रतिनिधी)