डेंग्यूच्या भीतीने महिला माहेरी

रोजगाराच्या शोधात मजुरांचे स्थलांतरण ही जिल्ह्यात नित्याचीच बाब झाली आहे. मात्र दारव्हा तालुक्यातील जवळगाव येथील लहान मुलांना स्थलांतरित करण्याची वेळ गावकर्‍यांवर आली आहे.

संतोष तांगडे - बोरीअरब

रोजगाराच्या शोधात मजुरांचे स्थलांतरण ही जिल्ह्यात नित्याचीच बाब झाली आहे. मात्र दारव्हा तालुक्यातील जवळगाव येथील लहान मुलांना स्थलांतरित करण्याची वेळ गावकर्‍यांवर आली आहे. महिनाभरापासून गावात सुरू असलेल्या डेंग्यू सदृश आजाराने लहान मुलांसह महिलांना माहेरी पाठविले आहे. गावात एकाही घरी लहान मुले दिसत नाही, एवढी दहशत गावकर्‍यांनी घेतली आहे. दारव्हा तालुक्यातील जवळगाव येथे महिनाभरापासून डेंग्यू सदृश आजाराची साथ सुरू आहे. जवळपास १०० मुलांंना या आजाराची लागण झाली. २५ च्यावर बालकांचे रक्त नमुने डेंग्यू सदृश असल्याचे उपचारात पुढे आले. काही रुग्णांवर नागपूर येथेही उपचार करावे लागले. सध्याही नागपूर येथे राधा सुधीर गुघाणे या बालिकेवर उपचार सुरू आहे. गेल्या महिनाभरापासून असलेल्या या आजाराची गावकर्‍यात चांगलीच दहशत निर्माण झाली आहे. आरोग्य विभागाने उपाययोजना केल्या तरी साथ थांबायचे नाव घेत नाही. त्यामुळे आता येथील गावकर्‍यांनी लहान मुलांना स्थलांतरित करण्याचा सपाटा लावला आहे. प्रत्येक घरातील लहान मुले आपल्या आईसह मामाच्या गावी गेले आहे. कुणी गावात येतोही म्हटले तरी तेथेच आणखी काही दिवस थांबा असा सल्ला जवळगावचे नागरिक देत आहे. जवळगाव हे १७०० लोकसंख्येचे गाव असून ३५० कुटुंब आहे. जवळपास ५० ते ६० कुटुंबातील लहान मुलांना त्यांच्या मातांसह स्थलांतरित करण्यात आले आहे. कोणत्याही घरात लहान मुल दिसत नाही. वयस्क महिला आणि पुरुष मंडळी तेवढी गावात दिसत आहे. यामुळे गावातील चहलपहल कमी झाली असून कुण्याही घरातून बालकाच्या रडण्याचा आवाज येत नाही. आजी-आजोबांसोबत खेळणारे नातवंड डेंग्यूच्या भीतीने बाहेरगावी गेल्याने आजी-आजोबा बेचैन झाले आहे. मात्र डेंग्यूच्या दहशतीने त्यांना घरी आणायचे कसे असा प्रश्न पडला आहे. डेंग्यू सदृश आजारानंतर आरोग्य यंत्रणेने या गावात तळ ठोकला. विविध उपाययोजनाही केल्या. मात्र गावकर्‍यांच्या मनातील भीती काढण्यात त्यांंनाही यश आले नाही. परिणामी गावातील गोकूळ स्थलांतरित झाले.