जिल्ह्यात पहिल्या लाटेत ३ एप्रिल २०२० रोजी कोरोनाचा पहिला रुग्ण आढळून आला होता. दुसऱ्या लाटेत मार्च ते मे या महिन्यात रुग्णसंख्या झपाट्याने वाढली. त्यानंतर रुग्णसंख्येचा आलेख हळूहळू घसरत गेला. सप्टेंबर महिन्यातही दैनंदिन एक, दोन पॉझिटिव्ह रुग्ण आणि एक, दोन डिस्चार्ज रुग्ण, असा अहवाल येत आहे. गुरुवार, दि.९ सप्टेंबर रोजी पहिल्यांदाच पॉझिटिव्ह आणि डिस्चार्ज, असे दोन्ही अहवाल निरंक आले आहेत. आतापर्यंत जिल्ह्यात ४१,७२८ रुग्ण आढळून आले आहेत. यापैकी ४१,०७३ रुग्णांनी कोरोनावर मात केली, तर आतापर्यंत ६३८ जणांचा मृत्यू झाला. कोरोनाची दुसरी लाट ओसरत असली तरी तिसऱ्या लाटेची शक्यता वर्तविण्यात येत असल्याने नागरिकांनी काळजी घ्यावी, असे आवाहन जिल्हा प्रशासन व आरोग्य विभागाने केले.
०००००
१६ सक्रिय रुग्ण
गुरुवारच्या अहवालानुसार एकही रुग्ण पॉझिटिव्ह आढळून आला नाही. सध्या गृहविलगीकरणात १६ रुग्ण असून, सर्वांची प्रकृती ठणठणीत असल्याचे आरोग्य विभागाने स्पष्ट केले. एकाही रुग्णाला ऑक्सिजन किंवा व्हेंटिलेटर लावण्याची गरज पडली नाही.