वाशिम : कोरोनाच्या महाभयंकर संकटात पिचलेल्या नागरिकांना वीजबिल माफी देण्याऐवजी चक्क विद्युत पुरवठा खंडित करण्याच्या नोटिसा बजावणाऱ्या महाविकास आघाडी सरकारच्या विरोधात भारतीय जनता पार्टीने ५ फेब्रुवारी राेजी हल्लाबोल केला. सरकारच्या तुघलकी धोरणांचा निषेध नोंदविण्यासाठी महावितरणच्या कार्यालयासमोर घोषणाबाजी करून कार्यालयाला टाो ठोकले.
कोरोनाच्या पार्श्वभूमीवर करण्यात आलेल्या लॉकडाऊनमध्ये महावितरण कंपनीने राज्यातील वीज ग्राहकांना अवाच्या सव्वा वीज बिले दिली. राज्याचे ऊर्जामंत्री नितीन राऊत यांनी वीज बिलाबाबत नागरिकांना दिलासा देण्याचे आश्वासन देऊनही महावितरणने वसुली सुरूच ठेवली. सरकार शब्दाला जागले नाही. धक्कादायक बाब म्हणजे सध्या महावितरणने राज्यभरातील 75 लाख वीजग्राहकांना विद्युत पुरवठा खंडित करणार असल्याच्या नोटिसा बजावल्या. सरकारच्या या तुघलकी धोरणाविरोधात भारतीय जनता पक्षाने जिल्हाभरात आंदोलनात्मक भूमिका घेऊन महावितरणविरोधात हल्लाबोल केला. वाशिममध्ये स्थानिक अधीक्षक अभियंता कार्यालयासमोर आंदोलन करण्यात आले. महावितरणच्या कार्यालयाला टाळे ठोकून घोषणाबाजी करण्यात आली. जिल्हा महामंत्री नागेश घोपे यांच्या नेतृत्वात करण्यात आलेल्या या आंदोलनात शहर महामंत्री गणेश खंडाळकर, तालुका महमंत्री अंबादास कालापाड, नगर परिषदेचे उपाध्यक्ष बापूभैया ठाकूर, शहर उपाध्यक्ष रामेश्वर ठेंगडे, संतोष शिंदे, रामप्रसाद सरनायक, रामभाऊ देव, पंकज इंगोले, उत्तमराव पोटफोडे, विश्वास ब्रह्मेकर, बजरंग आळणे, सूरज चौधरी, पवन बोलवार रूपालीताई देशमुख, अंजलीताई पाठक, संगीताताई इंगोले, छायाताई मडके, आशुतोष निरखी, रोहित चांदवाणी, सौरभ गंगावणे, पवण कणखर आदींसह कार्यकर्त्यांची उपस्थिती होती.