वाशिम : शिक्षक व शिक्षकेतर कर्मचाऱ्यांशी संबंधित विविध प्रश्न प्रलंबित असून, याविरोधात भाजप शिक्षक आघाडी जिल्हा शाखा वाशिमने आक्रमक पवित्रा घेत ८ सप्टेंबर रोजी जि.प. शिक्षणाधिकारी कार्यालयासमोर आंदोलन केले.
शिक्षक व शिक्षकेतर कर्मचाऱ्यांना जुनी पेन्शन योजना लागू करावी, वरिष्ठ व निवड श्रेणीच्या प्रशिक्षणाच्या तारखा तत्काळ घोषित करणे, १ नोव्हेंबर २००५ पूर्वी अंशतः अनुदानित शाळांमध्ये नियुक्त शिक्षक व शिक्षकेतर कर्मचाऱ्यांचे बंद केलेले भविष्य निर्वाह निधीचे खाते तत्काळ सुरू करावे, शिक्षक व शिक्षकेतर कर्मचाऱ्यांची भविष्य निर्वाह निधीची रक्कम व वैद्यकीय प्रतिपूर्तीची रक्कम तत्काळ देय करावी, परिविक्षाधीन सहायक शिक्षक (शिक्षण सेवक) परिविक्षाधीन शिक्षकेतर कर्मचारी (शिक्षकेतर सेवक) यांचे मानधन सातव्या वेतन आयोगाप्रमाणे वाढविण्यात यावे, शिक्षक भरती प्रक्रिया तत्काळ सुरू करावी, घोषित, अघोषित व मूल्यांकनास पात्र तुकड्या, शाळांना व कनिष्ठ महाविद्यालयांना अनुदान देण्याची प्रत्यक्ष कार्यवाही करावी यासह विविध मागण्या प्रलंबित असल्याने शिक्षक, शिक्षकेतर कर्मचाऱ्यांना विविध अडचणींना सामोरे जावे लागत आहे. याकडे लक्ष वेधण्यासाठी भाजपा शिक्षक आघाडीने बुधवारी आंदोलन केले.
०००००
... तर आंदोलन आणखी तीव्र करण्याचा इशारा
महाविकास आघाडी सरकारच्या काळात शिक्षण क्षेत्रात होत असलेल्या अनागोंदी कारभाराच्या विरोधात व शिक्षक शिक्षकेतरांच्या मागण्यासाठी आक्रमक पवित्रा घेतला असून, लवकरात लवकर मागण्या निकाली निघाल्या नाही तर यापुढे आंदोलन तीव्र करण्याचा इशारा भाजपा शिक्षक आघाडीचे जिल्हाध्यक्ष महेश उगले यांनी दिला.