कांता हाबळे
नेरळ ः कर्जत तालुक्यातील पिंपळोली गावा बाहेर उभ्या असलेल्या तीन स्कूल बसेस ह्या अज्ञात व्यक्तींकडून जाळण्यात आल्या आहेत. मंगळवारी मध्यरात्रीच्या सुमारास गावातील नागरिकांना अचानक आगीचा प्रकाश समोर आल्याने ही घटना समोर आली. घटनास्थळी अग्निशमन वाहन पोहचेपर्यंत तीनही बस जळून खाक झाल्याने गावात एकच खळबळ उडाली. धक्कादायक म्हणजे किरकोळ वादातून ह्या बसेस जाळण्यात आल्याचा संशय व्यक्त केला जात आहे.
कर्जत तालुक्यातील नेरळ- पिंपळोली येथे राहणारे चंद्रकांत सोनावले यांच्या मालकीची असलेली खाजगी स्कूल बसेस ह्या लॉकडाऊन काळात स्कूल बंद असल्याने नेहमी प्रमाणे गावाशेजारी मोकळ्या जागेत उभ्या करण्यात आल्या होत्या. मध्यरात्रीच्या सुमारास ह्या स्कूल बसला लागलेल्या आगीने पेट घेतल्याने अचानक पडलेल्या प्रकाशाने गावातील स्थानिकांनाच्या मदतीने ही बाब समोर आली. घटनेचे गांभीर्य ओळखून घटनास्थळी कर्जत तालुक्याचे DYSP अनिल घेर्डीकर तसेच नेरळ पोलीस ठाण्याचे पोलीस निरीक्षक तानाजी नारनवर ह्यांनी धाव घेतली. या संदर्भात नेरळ पोलीस ठाण्यात तक्रार दाखल करण्यात आली असून नेरळ पोलीस ठाण्याचे नव्याने आलेले पोलीस निरीक्षक तानाजी नारनवर अधिक तपास करत आहेत.