TRAI: व्होडाफोन आयडियाची जिओ- एअरटेलला टक्कर? सलग दुसऱ्या महिन्यात ग्राहकसंख्येत मोठी वाढ!

व्होडाफोन-आयडियाने पुन्हा एकदा आपली ताकद दाखवून दिली आहे. 'ट्राय'च्या ताज्या आकडेवारीनुसार, टेलिकॉम कंपनीने सलग दुसऱ्या महिन्यात आपली ग्राहकसंख्या वाढवण्यात यश मिळवले आहे.

भारतीय दूरसंचार क्षेत्रात वोडाफोन-आयडिया पुन्हा एकदा आपली पकड मजबूत करताना दिसत आहे. भारतीय दूरसंचार नियामक प्राधिकरणाने प्रसिद्ध केलेल्या ताज्या आकडेवारीनुसार, व्होडाफोन- आयडियाच्या नवीन ग्राहकांच्या संख्येत सलग दुसऱ्या महिन्यात मोठी वाढ नोंदवण्यात आली. हे सकारात्मक आकडे कंपनीच्या ग्राहक संख्येतील स्थैर्याचे आणि पुनरागमनाचे संकेत मानले जात आहेत.

ट्रायच्या मार्च २०२६ च्या अहवालानुसार, फेब्रुवारी महिन्यात कंपनीने २१ हजार ९२७ नवीन ग्राहक जोडले होते. मात्र, मार्च महिन्यात या आकड्याने मोठी झेप घेत १,०२,८९९ नवीन ग्राहकांची भर घातली आहे. विशेष म्हणजे, कंपनीला शहरांऐवजी ग्रामीण भागातून मोठा प्रतिसाद मिळत असून, मार्चमध्ये ग्रामीण भागातून तब्बल १,९२,२११ ग्राहक 'वी'शी जोडले गेले आहेत.

देशातील एकूण १५ सर्कल्समध्ये कंपनीने आपली ग्राहकसंख्या वाढवली आहे. यात गुजरात (१ लाख ०१ हजार ७४८), कर्नाटक (१ लाख ७०१), बिहार (५७ हजार ४५२) आणि उत्तर प्रदेशातील ४७ हजार ८६९ ग्राहकांचा समावेश आहे. याशिवाय आसाम, हरियाणा, पंजाब आणि तामिळनाडू यांसारख्या राज्यांतही ग्राहकांच्या संख्येत चांगली वाढ झाली. 

व्होडाफोन- आयडियाने आपल्या नेटवर्कमध्ये केलेली सातत्यपूर्ण गुंतवणूक आणि ग्राहकांसाठी आणलेल्या विशेष ऑफर्स या वाढीसाठी कारणीभूत ठरल्या आहेत. नॉनस्टॉप हिरो आणि 'सुपर हिरो' यांसारख्या प्लानमुळे ग्राहक कंपनीकडे आकर्षित होत आहेत. कंपनीने वेगाने 5G सेवा सुरू करण्यास सुरुवात केली. नुकतीच ९० नवीन शहरांमध्ये 5G विस्ताराची घोषणा करण्यात आली असून, मे २०२६ पर्यंत देशातील एकूण १३३ शहरांमध्ये ही सेवा उपलब्ध होणार आहे. फेब्रुवारी आणि मार्च या दोन्ही महिन्यांत १५ सर्कल्समध्ये सकारात्मक वाढ नोंदवून व्होडाफोन आयडियाने टेलिकॉम क्षेत्रात आपल्या स्पर्धकांना जोरदार टक्कर देण्यास सुरुवात केली आहे.