सोलापूर : लोकसभा निवडणुकीची ड्युटी संपवून मध्यरात्री घराकडे परतणार्या महापालिकेतील लिपिकास अडवून लाथाबुक्क्याने मारहाण करून रोकड, कपडे, हँडसेट व कागदपत्रांची बॅग पळवून नेणार्या सहा तरुणांना गुन्हे शाखेच्या पथकाने अटक केली. काल्या उर्फ प्रेम बासू पवार, अमर विष्णू राठोड, जीवन जनार्दन लवटे, आबा मुरलीधर डोलारे, विकास नामदेव चव्हाण, पृथ्वी तानाजी राठोड (सर्व रा. कमलानगर, सोलापूर) अशी अटक केलेल्या आरोपींची नावे आहेत. अरविंद कुलकर्णी (वय ५२, रा. सोनामातानगर, नवीन आरटीओ कार्यालयाजवळ, सोलापूर) यांनी याबाबत विजापूर नाका पोलीस ठाण्यात फिर्याद दाखल केली होती. १८ एप्रिल रोजी मध्यरात्री साडेबारा वाजता ते निवडणुकीचे कामकाज संपवून पायी चालत घराकडे निघाले होते. ज्ञानसंपदा शाळेसमोर सहा तरुणांनी त्यांना अडवून मारहाण करून बॅग पळविली होती. या जबरी चोरीचा तपास करताना गुन्हे शाखेच्या पथकाला १२ मे रोजी नेहरूनगर बसथांब्यावर काल्या उर्फ प्रेम हाताशी लागला. त्याच्याकडे चौकशी केल्यावर सहा जणांनी मिळून हा गुन्हा केल्याची कबुली त्याने दिली.