पगारवाढ मागायला गेला आणि नोकरीच गेली; अप्रेजलच्या मीटिंगमध्ये थेट राजीनामा द्यायलाच सांगितलं

Appraisal Meeting Job Loss: पगारवाढ मागण्यास गेलेल्या एका कर्मचाऱ्याला थेट राजीनामा दे, असे सांगण्यात आले. याव्यक्तीने त्याचा अनुभव सोशल मीडिया प्लॅटफॉर्मवर शेअर केला आहे. 

अनेक कंपन्या आणि संस्थांमध्ये पगारवाढीची प्रक्रिया सुरू झाली आहे. अशातच एका व्यक्तीने त्याचा पगारवाढीसंदर्भातील धक्कादायक सगळ्यांना सांगितला आहे. आयटी कंपनीत असलेल्या या कर्मचाऱ्याने अप्रेजलच्या मीटिंगमध्ये पगारवाढ दिली जावी, असा मुद्दा मांडला. त्यावर कंपनीतील वरिष्ठांनी तू राजीनामा दे म्हणून सांगितले. 

सोशल मीडियावर शेअर करण्यात आलेल्या या पोस्टमध्ये टेक कर्मचाऱ्याने म्हटले आहे की, मी अनेक महिन्यांपासून पगारवाढीचा वाट बघत होतो. अखेर पगारवाढीसंदर्भात बैठक झाली, तेव्हा मला वाटलं की, माझ्या पगारात वाढ होईल, पण बैठकीत मला राजीनामा देण्यास सांगितले आणि दुसरीकडे जॉब शोधण्यास सांगण्यात आले आहे. 

राजीनामा द्यायला का सांगण्यात आले?

कर्मचाऱ्याने म्हटले आहे की, मी एका सेमीकंडक्टर कंपनीसाठी काम करतो. ती कंपनी माझ्या कंपनीला तितके पैसे देत नाहीये, जितका पगार मला कंपनीकडून दिला जात आहे. पगार आणि कंपनीकडून येणारे पैसे यातील फरक सांगण्यात आला. आता त्यांची इच्छा आहे की, मी राजीनामा द्यावा. 

पगारवाढ मागायला गेल्यानंतर मला राजीनामा द्यायला सांगितले जाणे हे माझ्यासाठी धक्कादायक होतं. मला राजीनामा द्यायचा नाहीये, पण चांगले पॅकेज कसे मिळवू शकतो, यासाठी मला सल्ला हवाय, असेही या पोस्टमध्ये म्हटले आहे. 

लोकांचे वेगवेगळे सल्ले 

या पोस्टवर लोकांनी आपली मते मांडतांना त्याला वेगवेगळे सल्ले दिले आहेत. काहींनी म्हटले आहे की, स्वतःहून राजीनामा दिला, तर नुकसान होऊ शकते. त्याऐवजी कंपनीशी सगळे लेखी स्वरुपात बोल. काहींनी म्हटले आहे की, आधी नोकरीचा करार आणि त्यातील नियम व्यवस्थित समजून घे. एकाने म्हटले आहे की, कंपनीने स्वतःहून काढले तर जास्त पैसे मिळण्याची शक्यता जास्त असते.