मुंबई बंदर संघ सलग चौथ्यांदा विजेता

राज्यस्तरीय शूटिंगबॉल स्पर्धा : देवगड येथील हनुमान युवक मंडळातर्फे आयोजन

पुरळ : देवगड येथील हनुमान युवक क्रीडा मंडळामार्फत घेण्यात आलेल्या राज्यस्तरीय शूटिंगबॉल स्पर्धेत मुंबई बंदर संघाने सलग चौथ्यांदा विजेतेपद पटकाविले आहे.प्रजासत्ताक दिनानिमित्त आयोजित राज्यस्तरीय शूटिंगबॉल ुस्पर्धेत मुंबई, ठाणे, सिंधुदुर्ग व कोल्हापूर या विभागांतून २१ संघांनी सहभाग घेतला होता. यामध्ये सिंधुदुर्ग पोलीस, मुंबई महानगरपालिका व नौदलाचा संघ सहभागी झाले होते.ही स्पर्धा देवगड हायस्कूलसमोर पटांगणात खेळविण्यात आली. बाद फेरीच्या सामन्यांमध्ये अंतिम लढत मुंबई बंदर व माझगाव स्पोर्टस् या दोन मुंबई पोर्ट ट्रस्टच्या संघामध्ये झाली. मुंबई बंदर संघाने २१-१५ असा विजय मिळवून विजेतेपद पटकाविले.हनुमान युवक क्रीडा मंडळाचे माजी अध्यक्ष मोहन शिनगारे यांच्या हस्ते विजेत्या संघाला ३५०१ रूपये रोख व चषक, उपविजेत्या संघाला २५०१ रूपये रोख व चषक मंडळाचे अध्यक्ष विजय जगताप यांच्या हस्ते प्रदान करण्यात आला. कळवा, ठाणे संघाला उत्तेजनार्थ १००१ रूपये देण्यात आले. स्पर्धेतील उपांत्य व अंतिम फेरीचे सामने प्रकाशझोतात खेळविण्यात आले. पारितोषिक वितरण कार्यक्रमाला विजय जगताप, उल्हास मणचेकर, निशिकांत साटम, दत्तात्रय चव्हाण, मोहन शिनगारे, राजेंद्र राणे, पांडुरंग भाबल, लक्ष्मण तारी, शिवाजी कांदळगांवकर, आदींसह मंडळाचे पदाधिकारी व कार्यकर्ते उपस्थित होते. विलास रूमडे यांनी सूत्रसंचालन केले. (वार्ताहर)