पुसेगावात राज्यस्तरीय कृषी-पशुपक्षी प्रदर्शन

तयारी सुरू: १९ डिसेंबरपासून प्रारंभ

पुसेगाव : सद्गुरु श्री सेवागिरी महाराजांच्या ६७ व्या पुण्यस्मरणानिमित्त श्री सेवागिरी देवस्थान ट्रस्ट व शुअर शॉट यांच्या संयुक्त विद्यमाने शुक्रवार, दि. १९ डिसेंबर ते दि.२३ या कालावधीत पुसेगाव येथे राज्यस्तरीय सेवागिरी कृषी व पशुपक्षी प्रदर्शनाचे आयोजन करण्यात आल्याची माहिती ट्रस्टचे अध्यक्ष डॉ. सुरेश जाधव यांनी दिली.
या कृषी प्रदर्शनात आधुनिक तंत्रज्ञान, यंत्रसामुग्री व शेतीविषयक मार्गदर्शन तसेच सामान्य शेतकऱ्यांना जे पाहिजे, त्या प्रकारचे विविध नावीन्यपूर्ण स्टॉल उभारण्यात येणार आहेत. यावर्षी प्रथमच या प्रदर्शन कालावधीत धान्य महोत्सव व सुधारित म्हशींची स्पर्धा भरविण्यात येणार असल्याने जास्तीत जास्त शेतकऱ्यांनी याचा लाभ घ्यावा, असे आवाहन ट्रस्टचे अध्यक्ष डॉ. सुरेश जाधव यांनी केले आहे.
यावेळी विश्वस्त मोहनराव जाधव -पाटील, डॉ. प्र. ल. भुजबळ, शिवाजीराव जाधव, अ‍ॅड. विजयराव जाधव, शुअर शॉटचे संदीप गिड्डे, व्यवस्थापक रूपेश कोळेकर आदी उपस्थित होते. प्रदर्शनात मुख्यता कोरडवाहू शेतीचा विकासच्या दृष्टीने शेती व शेतीपूरक व्यवसाय, दुग्धव्यवसाय, पोल्ट्री उद्योग, रेशीम उद्योग, कुक्कटपालन, मत्स्य व्यवसायासोबतच कोरडवाहू शेतीसाठी व मूल्यवर्धन विक्री व्यवस्थापन, कृषी संलग्न व्यवसायाशी संबंधित शेतकरी समूह किंंवा गट व त्यांचे संघाद्वारे करण्यावर विशेष भर देण्यात येणार आहे. यांत्रिकीकरण ट्रॅक्टरर्स, ट्रॅक्टरचलित अवजारे, स्पेअरर्स, पॉवर टिलर ब्रश, कटर, थे्रशर, रोटावेटर आदी.
पॉलीहाऊस, ग्रीनहाऊस, शेडनेट हाऊस, ठिंबक सिंंचन, तुषार सिंंचन, पशुपालन, शेळीपालन, ससेपालन, इमूपालन, मत्स्य व्यवसाय, रेशीम उद्योग, नर्सरी, रोपवाटिकांचा समावेश असणार आहे. (प्रतिनिधी)