सातारा : सातारा शहराच्या हद्दवाढीत नव्याने समाविष्ट झालेल्या शाहूपुरी भागातील समस्यांमध्ये दिवसेंदिवस वाढ होऊ लागली आहे. कचरा संकलन, पथदिवे, रस्ते अशा मूलभूत प्रश्नांची प्रशासनाने तातडीने सोडवणूक करावी, अशी मागणी सातारा जिल्हा सहकारी गृहनिर्माण संस्थेच्यावतीने करण्यात आली आहे.
याबाबत मुख्याधिकारी अभिजित बापट यांना देण्यात आलेल्या निवेदनात म्हटले आहे की, सातारा शहराची हद्दवाढ होत असताना त्याआधी गावठाणामध्ये वाढ होणे गरजेचे आहे. कारण शासकीय येणे कर व नगरपालिका कर या दोन्ही आर्थिक करांचा बोजा नागरिकांवर पडणार आहे. त्यामुळे गावठाण वाढीचा ठराव पालिकेने मंजूर करावा. घनकचरा ट्रॅक्टरवर स्पीकरद्वारे कर भरण्याबाबत वारंवार सूचना केल्या जातात; परंतु नेमका कर कशाप्रकारे व किती भरावा, हे प्रशासनाने स्पष्ट न केल्याने नागरिकांमध्ये संभ्रम निर्माण झाला आहे.
ग्रामपंचायतीचा पालिका हद्दीत समाविष्ट झाल्यापासून येथील पथदिवे बंद आहेत. नागरिकांकडून वारंवार तक्रारी करूनही याची नोंद घेतली जात नाही. कचरा संकलनासाठी ट्रॅक्टरची व्यवस्था करण्यात आली असली, तरी यामध्ये अनियमितता आहे. त्यामुळे कचऱ्याचा प्रश्न गंभीर बनू लागला आहे. शाहूपुरी परिसरातील गेंडामाळ नाका ते शाहूपुरी चौक या रस्त्यावरील खड्डे तातडीने मुजवावे, हद्दवाढीच्या भागात बंदिस्त गटार योजना राबवावी, पूर्वी ८ अ च्या उताऱ्यासाठी ग्रामपंचायत स्तरावर वीस रुपये शुल्क भरावे लागत होते. आता नगरपरिषद स्तरावर याच उताऱ्यासाठी तीनशे ते चारशे रुपये मोजावे लागत आहेत. याबाबत योग्य त्या उपाययोजना कराव्यात, अशी मागणी निवेदनात केली आहे.
निवेदनावर गृहनिर्माण फेडरेशनचे अध्यक्ष नंदकुमार काटे, रंगराव जाधव, दिलीप कडव, सुनील कांबळे, सुनीता राजेघाडगे, मधुकर जाधव, ललित सातघरे, चेतन खराडे, अतुल शिंदे, विक्रम चोरगे आदींच्या सह्या आहेत.