वाळूमाफियांना सोसवेना दंडाचा भार!

वडूजमधील स्थिती : जप्त केलेल्या वाहनांचा तहसील कार्यालयाला वेढा

वडूज : अवैध वाळू वाहतूक करणाऱ्यांवर तहसीलदारांनी कारवाईचा बडगा उगारला होता. धडक मोहीम राबवून अनेक वाहने तहसील कार्यालयात जप्त करून आणण्यात आली आहेत. मात्र एक लाखाहून पाच लाखांपर्यंत वाहन चालकांवर दंडात्मक कारवाई करण्यात आल्यामुळे वाहन मालकांची गोची झाली आहे. दंड भरण्यासाठी त्यांच्याकडे पैसे नसल्यामुळे गेल्या काही दिवसांपासून सर्व वाहने धूळ खात तहसीलकार्यालयासमोर पडून आहेत.
गेल्या महिन्यात पुसेगाव येथील जेसीबी व आंबवडे, नडवळ येथील ट्रॅक्टर अवैध वाळू उपसा करताना तताडीने कार्यालयाच्या पथकाने पकडला. परंतु जेसीबीला ५ लाख ४० हजार दंड व प्रत्येकी ट्रॅक्टरला १ लाख ३५ हजार दंड तहसीलदारांनी आकारल्यामुळे ही वाहने तहसील आवारात पडून आहेत. यामुळे दैनंदिन ये-जा करणाऱ्या नागरिकांना व येथील कर्मचाऱ्यांना वाहनांचे अडथळे पार करीत प्रवेश करावा लागत आहे. दंडाची रक्कम कमी व्हावी म्हणून प्रांताकडे अपील करणार असल्याचे वाहन मालकांचे म्हणणे आहे.
अवैध वाळू पकडून तहसील कार्यालयाच्या बाहेरील बाजूस ही ७५ ब्रॉस वाळू साठवून त्याचा लिलावही करण्यात आला होता. परंतु आजअखेर ही वाळू लिलाव होऊनही उचलली गेली नाही. लिलाव होऊनही वाळू न उचलण्यामागचे कारण कारण काय असा प्रश्न यामुळे उपस्थित झाला आहे. जीवाची पर्वा न करता रात्री-अपरात्री तहसीलदार व त्यांचे सहकारी नदी, ओढे यांच्या पात्रात जाऊन अवैध वाळू वाहतुकीला चाप बसविण्यासाठी प्रयत्न करीत आहेत. पोलिसांचेही सहकार्य लाभत आहे. (प्रतिनिधी)