सातारा : येथील दिवंगत क्रांतिसिंह नाना पाटील जिल्हा शासकीय रुग्णालयात नव्याने उभारण्यात आलेल्या आॅक्सिजन निर्मिती प्रकल्पाचे उद्घाटन पालकमंत्री बाळासाहेब पाटील यांच्या हस्ते झाले. या वेळी त्यांनी आॅक्सिजन प्रकल्प उभा करणाऱ्या कंपनीच्या प्रतिनिधींकडून निर्मितीची माहितीही जाणून घेतली.
या उद्घाटन कार्यक्रमाला जिल्हाधिकारी शेखर सिंह, मुख्य कार्यकारी अधिकारी विनय गौडा, जिल्हा शल्यचिकित्सक डॉ. सुभाष चव्हाण, सार्वजनिक बांधकाम विभागाचे कार्यकारी अभियंता शंकर दराडे, उपअभियंता राहुल अहिरे आदी उपस्थित होते.
पालकमंत्री पाटील यांनी कोरोना संसर्गाच्या दुसऱ्या लाटेत सुरुवातीला आॅक्सिजनचा तुटवडा जाणवला होता. आता केंद्र शासनाच्या योजनेतून जिल्हा रुग्णालयात आॅक्सिजन प्रकल्प सुरू करण्यात आला आहे. या प्रकल्पात तयार होणारा आॅक्सिजन रुग्णालयापर्यंत पोहोचविण्याची व्यवस्था करण्यात आली आहे. यामुळे रुग्णांसाठी फायदा होणार आहे, असे सांगितले.
चौकट :
१९ ठिकाणी प्रकल्प...
जिल्हा रुग्णालयासह १९ ठिकाणी आॅक्सिजन निर्मितीचे प्रकल्प उभे करण्यात आले आहेत. या प्रकल्पाचा वीजपुरवठा खंडित होऊ नये म्हणून १९ जनरेटर आहेत. या प्रकल्पांमुळे आॅक्सिजनची कमतरता भासणार नाही, असेही पालकमंत्र्यांनी स्पष्ट केले.
फोटो दि.२८सातारा सिव्हिल फोटो...
फोटो ओळ : सातारा येथील जिल्हा शासकीय रुग्णालयातील आॅक्सिजन प्रकल्पाचे उद्घाटन पालकमंत्री बाळासाहेब पाटील यांच्या हस्ते झाले. या वेळी जिल्हाधिकारी शेखर सिंह, मुख्य कार्यकारी अधिकारी विनय गौडा आदी उपस्थित होते.
....................................................................